Në Malishevë deri tash 72 të shëruar, vetëm tri raste aktive

Një nga dy të shëruarit sonte nga koronavirusi është nga Malisheva. Kështu ka bërë të ditur kjo komunë përmes një njoftimi për media.

Sipas tyre deri tash, numri i të shëruarve ka arritur në 72 ndërkaq raste aktive janë tre pacientë.

“Edhe një person nga Komuna e Malishevës, është shëruar plotësisht nga virusi i COVID-19, duke e rritur numrin e të shëruarve në 72 persona të shëruar. Rasti i shërimit të këtij pacienti, është konfirmuar nga Instituti Rajonal i Shëndetësisë Publike (IRSHP) në Prizren.Me këtë rast të shëruar, numri i përgjithshëm i pacientëve të shëruar në Komunën e Malishevës, shkon në 72 persona, ndërsa aktiv me COVID-19, janë edhe tre pacient”, thuhet në njoftim.

Pas konfirmimit të këtij rasti, nga njoftimi bëhet e ditur se, nënkryetari i Komunës së Malishevës, Hajdin Berisha, e ka përsëritur thirrjen e Institutit Kombëtar të Shëndetësisë Publike, për të gjithë qytetarët, që të vazhdojnë t’i respektojnë masat dhe udhëzimet, për mbajtje të distancës fizike, mbajtjen e pajisjeve mbrojtëse, shmangien nga vendet me numër të madh të qytetarëve dhe mbajtje të higjienës, pasi kjo, sipas tij, mbetet arma e vetme dhe më efektive për luftimin e COVID-19.