(KosovaPress) - Pezullimi i shërbimeve jo urgjente në klinikat dhe ambulancat specialistike në Qendrën Klinike Universitare të Kosovës si pasojë e situatës së krijuar nga pandemia COVID-19, po konsiderohet shkelje e të drejtave dhe lirive të njeriut.
Po ashtu pacientët po përballen edhe me kosto të lartë pasi shërbimet e njëjta mjekësore, po detyrohen t’i marrin në spitalet private. Për këto veprime Shoqata e Pacientëve të Kosovës po kërkon hetim.
Avokati i Popullit, Naim Qelaj thotë se vendimet të tilla po merren pa bazë ligjore dhe po përbëjnë shkelje të të drejtave dhe lirive të njeriut.
Qelaj për KosovaPress thotë se këto reduktime të shërbimeve spitalore në QKUK do duhej të kishin një plan se ku do të mund të merreshin.
“Duhet me pas kujdes reduktime dhe kufizime të tilla të të drejtave dhe lirive të njeriut mund të bëhen vetëm nëse janë të përcaktuara me ligj. Në të kundërtën paraqesin shkelje të të drejtave dhe lirive të njeriut e padyshim dhe veprim jo të ligjshëm të organeve kompetente. Duhet me iu dhënë mundësi alternative qytetarëve që kanë nevojë për shërim dhe trajtim spitalor e që nuk janë të infektuar me COVID. Në asnjë moment qytetari nuk duhet me e lënë pa asnjë mundësi në rast se nuk ofrohen shërbime specialistike të tilla mund të ofrojnë sektorët tjerë ose në forma të tjera por të mbuluara dhe koston e tyre duhet ta mbulojnë institucionet”, u shpreh ai.
E Shoqata e Pacientëve të Kosovës madje ka paralajmëruar edhe hetim për pezullimin e shërbimeve elektive.
Kryetari i Shoqatës së Pacientëve në Kosovë, Besim Kodra thotë se dëmi që po iu shkaktohet pacientëve duke i mbyllur këto shërbime është mjaftë i madh, madje edhe po shtohen edhe listat e pritjeve.
Kodra thotë se pacientët që po u mohohen këto shërbime në institucionet publike dhe të cilat po duhet t’i marrin në ato private, nuk po kompensohen as nga Qeveria e Kosovës.
“Është hera e tretë që në Kosovë po ndërpriten shërbimet elektive shëndetësore dhe se kjo padyshim iu ka shkaktuar dëm të madh të pacientëve dhe ka shtuar listat e pritjes dhe ka krijuar një mundësi për abuzim që pacientët e institucionet shëndetësore të barten në institucionet private. Ne konsiderojmë se ndërprerja e shërbimeve shëndetësore në këtë fazë duke pasur edhe konstatim të Avokatit të Popullit, se kjo është shkelje. Konsideroj se kemi të bëjmë me një ndërprerje të kundërligjshme e cila meriton një hetim sepse qytetarët janë në hall duke dëmtuar nga mosmarrja e shërbimeve nga institucionet publike, por nuk janë duke u kompensuar nga qeveria për shumat marramendëse të parave që shfrytëzojnë në marrjen e shërbimeve shëndetësore në institucionet private”, theksoi ai.
Kryetari i Shoqatës së Pacientëve të Kosovës thotë se institucionet shtetërore para se të vendosin për kufizim të shërbimeve jo urgjente duhet të ofrojnë alternativa tjera për pacientët.
Kritika ka pasur edhe deputeti i opozitës, Bekim Haxhiu.
Për shkak të numrit të madh të pacientëve që kishin nevojë për hospitalizim pas infektimit me COVID-19, nga 31 gusht i këtij viti nuk po ofrojnë shërbime as Ambulancat Specialistike të cilat janë shndërruar në qendra për trajtim të pacientëve me koronavirus.
Gjatë kësaj jave në SHSKUK ka rënë numri i pacientëve me koronavirus që po kërkojnë trajtim spitalor.