Ndalet operimi i njësisë A4, KEK: Mungesat po mbulohen nga Shqipëria

Korporata Energjetike e Kosovës (KEK) ka njoftuar se njësia A4 e Termocentralit Kosova A është ndalur në mënyrë të kontrolluar nga operimi, si pasojë e rrjedhjeve të ujit në kaldajë, konkretisht në zonën e tejnxehësit.

Në njoftimin e KEK-ut thuhet se stafi profesional i Termocentralit ka vlerësuar se ndalimi i njësisë ka qenë i domosdoshëm dhe në përputhje të plotë me standardet teknike dhe të sigurisë, siç theksohet, me qëllim të parandalimit të dëmtimeve më të mëdha dhe të paparashikueshme në pajisje.

Në njoftim thuhet se një pjesë e konsiderueshme e kapaciteteve të munguara të energjisë po sigurohen nga Shqipëria.

“Ndërkohë, falë bashkëpunimit të vazhdueshëm ndërmjet Korporatës Energjetike të Kosovës (KEK) dhe Korporatës Energjetike Shqiptare (KESH), në situata të tilla është siguruar një pjesë e konsiderueshme e kapacitetit të munguar përmes shkëmbimit të energjisë me KESH, deri në rikthimin e njësisë në operim, duke kontribuar në ruajtjen e stabilitetit të furnizimit me energji elektrike”, thuhet në njoftim.

Sipas njoftimit sapo të krijohen kushtet teknike, pas ftohjes së njësisë, do të bëhet identifikimi i saktë i burimit të rrjedhjeve, pas së cilës thuhet se do të fillojë menjëherë procesi i sanimit.