Ndahen 705 mijë euro për investime në infrastrukturë në Kaçanik

Ministria e Infrastrukturës e ka mbështetur komunën e Kaçanikut edhe me 705 mijë euro të tjera për asfaltim të disa rrugëve.

Kjo është bërë e ditur pas nënshkrimit të një marrëveshje ndërmjet kryetarit të kësaj komune, Besim Ilazi dhe ministrit të Infrastrukturës Pal Lekaj, të martën, bëhet e ditur përmes një komunikate për media.

“Të mirat për qytetarët tanë janë pjesë e punës dhe angazhimeve tona të përditshme. Edhe pesë projekte të reja kapitale do të realizohen në Komunën e Kaçanikut falë përkrahjes së Ministrisë së Infrastrukturës e cila ndau 705.000 euro për realizimin e pesë projekteve në Kaçanik. Asfaltimi i rrugës Çamëria- Bajnicë- Rakaj, asfaltimi i rrugës Triumf Riza- Stagovë, zgjerimi i rrugës Avdurrahim Shehu, asfaltimi i rrugës lokale Kaçanik, si dhe projekti ndërtimi i rrugës Idriz Seferi”, ka thënë Ilazi.