Mushkolaj: Shteti dhe ne kemi dështuar në adresimin e krimeve të luftës

Profesoresha e drejtësisë në Universitetin e Prishtinës dhe ish-gjyqtarja e Gjykatës Kushtetuese, Gjylieta Mushkolaj, ka thënë se shteti ka dështuar në adresimin e krimeve të luftës nga Serbia, ndërsa ka fajësuar edhe qytetarët që nuk i kanë bërë presion më shumë qeverive për t’u marrë me këtë çështje.

Mushkolaj ka thënë se mungesa e vullnetit politik ka bërë që të abuzohet në kohë paqeje me viktimat e luftës.

“Jemi dëshmitar se mungesa e vullnetit politik ka bërë që të abuzohet në kohë paqeje me viktimat e luftës. Te ne është bërë gjenocid, është bërë mizori. Pas çlirimit, duket se e kemi harruar se si kemi ardhur deri te kjo liri dhe si e kemi filluar shtetndërtimin. Shteti ka dështuar, ne kemi dështuar që nuk i kemi bërë presion të madh shtetit për t’u marrë me këtë çështje”, ka thënë ajo në KTV.

Mushkolaj e ka përmendur Velko Odalloviqin si shembull për të treguar se sa ka qenë vullneti politik në Kosovë për t’u marrë me krimet e luftës.

“Ka pas dialog me dikë si Velko Odalloviq për çështjen e të zhdukurve me dhunë, e tregon se cili ka qenë vullneti ynë politik. Odalloviq, me të cilin kemi dialoguar për një kohë të gjatë, ka qenë autoriteti qendror i Millosheviqit kur kanë ndodhur mizoritë më të mëdha në Kosovë. Si kemi lejuar me një njeri të tillë të dialogojmë”, ka thënë Mushkollaj.

Edhe BETIMI PËR DREJTËSI 30 pri 2022 Mushkolaj: Qeveritë s’kanë guxuar t’i rregullojnë çështjet që kanë të bëjnë me komunitetet fetare

Profesoresha e UP-së ka shpresë se në marrëveshjen përfundimtare me Serbinë mund të hapen dyert për t’i adresuar krimet e luftës në nivele ndërkombëtare.

“Vetëm marrëveshja përfundimtare mund të na hapë rrugë për t’i adresuar këto krime në gjykata ndërkombëtare. Vetëm një marrëveshje e këtillë mund të na mundësojë që të gjejnë më në fund paqen viktimat”, ka theksuar ajo.