Vebi Mujku, shef i zyrës për Punë Sociale në Prishtinë, iu ka bërë thirrje institucioneve që të krijohet Organi i Kujdestarisë, pasi sipas tij, shumica e Qendrave për Punë Sociale, nuk kanë mundësinë të ushtrojnë një rol të tillë.
Ai shkroi në Facebook të hënën se situata është e rënduar pasi Organi i Kujdestarisë, ligjërisht përmban domethënie të ndryshme.
“Sot, shumica e Qendrave për Punë Sociale në Kosovë nuk e kanë mundësinë e ushtrimit të rolit të Organit të Kujdestarisë edhe sikur të merret një vendim që të themelohet Organi i Kujdestarisë brenda tyre. Sado që reagimet e tilla hasin në vesh të shurdhër, një ditë dikush do të kthjellet dhe do ta kuptojë seriozitetin e kësaj çështje, por pasojat si zakonisht askush nuk do ti vuajë, përveç klientëve që janë fëmijët, të rritur, të moshuar dhe familje të tëra”, shkroi ai.
Mujku iu bëri thirrje presidentes Vjosa Osmani, kryeministrit Albin Kurtit, Avokatit të Popullit, Naim Qelaj dhe deputetëve, që të iniciojnë themelimin dhe funksionimin e këtij institucioni, që sipas Ligjit për Shërbime Sociale dhe Familjare, është organ komunal profesional kompetent, për çështje sociale, përgjegjës për mbrojtjen e interesave të fëmijëve dhe të rriturve.
“Në shumicën e ligjeve ekzistues dhe ata të cilët janë në proces të finalizimit si Projekt Kodi Civil dhe të tjerë, në asnjë vend nuk përmendet Qendra për Punë Sociale (QPS) apo vetëm shkarazi, por përmendet vetëm Organi i Kujdestarisë (OK). Në secilin rast ekspertët e lanë të nënkuptojnë se Qendra për Punë Sociale e luan rolin e Organit të Kujdestarisë, e që në fakt jo. Deputetët e votojnë secilin Ligj ashtu siç ju servohet pa i marr parasysh asnjëherë komentet dhe reagimet të cilat ju bëhen në secilën situatë dhe takim të mundshëm”, tha tutje Mujku.
Kreu i zyrës për Punë Sociale në Prishtinë, tha se në kornizën ligjore, termi “Organ i Kujdestarisë” përmendet me mijëra herë, përderisa Qendra për Punë Sociale vetëm dhjetëra herë.
“Qendra për Punë Sociale nuk mund të funksionojë në cilësinë e Organit të Kujdestarisë, por as Organi Kujdestarisë në cilësinë e Qendrës për Punë Sociale. Është e rrugës që vitin 2023 të fillojmë t’i korrigjojmë gabimet e bëra ndër vite”.