Mitrovica e jugut dyshon se ajo e veriut po ndryshon projektin për sheshin “Mbreti Petër”

Struktura prej betoni tashmë është ndërtuar në vendin ku ishte i ndërtuar muri ilegalisht, i cili u rrënua.

Por, ka dyshime se zyrtarë të Mitrovicës Veriore kanë ndryshuar projektin me qëllim që të zvogëlohet pjesa hyrëse te kunjat lëvizës, raporton KTV.

Nga ana tjetër, kryetari i Mitrovicës Veriore, Goran Rakiq, nuk ka pranuar të flasë, pavarësisht se fillimisht tha se do të përgjigjet për këtë.

Ndërkohë, Ministria e Mjedisit që i mbikëqyrë punimet e këtij projekti, përmes një përgjigjeje me shkrim mohon të ketë pasur ndonjë ndërrim të punimeve në këtë projekt.

“Në kontaktet që kemi pasur ne si kabinet me Inspektoratin e Ministrisë së Mjedisit, nuk ka asgjë të re atje sa u përket ndryshimeve eventuale të projektit. Inspektorati i Ministrisë së Mjedisit asgjë nuk do të lejojë të ndryshojë jashtë marrëveshjes së 4 shkurtit 2017”, thuhet në përgjigjen e Ministrisë.

Qytetarët shprehin dyshimet e tyre, por mirëpresin përfundimin sa më të shpejtë të punimeve që u mundëson lëvizjen e lirë.

Ndërtimi i sheshit të quajtur “Mbreti Petër”, kishte filluar pas rrënimit të murit në afërsi të Urës së Ibrit, në shkurt të këtij viti. Punimet për ndërtimin e tij dhe hapjen e urës së Ibrit është paraparë të përfundojnë në maj.