Ministria e Tregtisë mbështet biznesin që iu ndalua importi nga Shqipëria

Ministria e Tregtisë i është vënë në mbrojtje biznesmenit Sylejman Neziri, të cilit, pas një vendimi të Gjykatës së Apelit, prej një jave i është ndalur në doganë një maune me produkte të “Coca Cola Company”, të importuara nga Shqipëria.

Vendimi i gjykatës pezullon importin paralel të këtyre produkteve. Kjo, meqë një biznes tjetër ka autorizim për të tilla importe nga Serbia.

Por zëvendësministri i Tregtisë, Getoar Mjeku, i tha KOHËS se në Kosovë nuk ka ligj që ndalon importin paralel.

“Tregu i lirë mbrohet me kushtetutë dhe ligj. Ligji nr. 06/L-015 për masat doganore për mbrojtjen e të drejtave të pronësisë intelektuale liron Doganën nga detyrimi për të ndaluar mallin e prodhuar me autorizimin e mbajtësit të markës tregtare. Kurse Ligji nr. 04/L-026 për markat tregtare parasheh se mbajtësi i markës nuk mund ta ndalojë shitjen e mallit pasi ta ketë nxjerrë mallin në treg”, tha Mjeku.

Biznesmeni Neziri ka protestuar para terminalit doganor në Prizren, ku prej 10 ditësh i është ndaluar mauna me pijet “Coca Cola”, “Fanta” dhe “Sprite”. Ai thotë se me këtë masë ndalimi po imponohet që këto pije të importohen nga Serbia.

“Nuk di ata shqiptarë që janë pse e përkrahin aq shumë produktin serb. Nëse nuk e përkrahim prodhimin vendor edhe vetveten duhet kjo rini ta lëshojë krejt Kosovën”, tha Neziri nga “Plus Center”.

Në Doganë nuk folën për këtë rast. Ndërkaq zyrtarët e Gjykatës së Apelit vetëm pohuan se për këtë çështje juridike është vendosur në janar të këtij viti dhe nuk dhanë më shumë informacione.

“Lidhur me pyetjen e juaj ju njoftoj se lënda e kërkuar është kryer nga Gjykata e Apelit më 24.1.2002, është e ekspeduar në Gjykatën Themelore në Prishtinë, Departamenti për Çështje Ekonomike, më datën 27.1.2022, me numrin AE.nr.297/2021. Aktvendimin ta kërkoni nga ajo gjykatë”, thuhet nga administratori i Gjykatës së Apelit të Kosovës, Nysret Arifi.

E, biznesmeni Neziri kërkon që t’i lihen duart e lira të veprimit, meqë konsideron se ligji është në anën e tij.

“Unë nuk kam ardhur këtu për me i nxjerrë pare Qeverisë apo dikujt tjetër, nuk e dua asnjë cent. Unë e lus Qeverinë e Republikës së Kosovës që unë të jem i lirë dhe të punoj i lirë në këtë vend”, tha Neziri.

E, zëvendësministri Mjeku alarmoi se vendimet e këtilla të gjykatës kanë ndikim negativ në xhepin e qytetarëve.

“Ndalimi i importit paralel në çfarëdo forme mund të përqendrojë tregun në duart e një ndërmarrjeje dhe të shkaktojë ngritjen e çmimeve”, tha Mjeku.

Ministria e Tregtisë, si hartuese e legjislacionit për markat tregtare, ka dhënë edhe një opinion të shkruar për këtë çështje dhe, sipas Mjekut, po i shqyrton mundësitë ligjore për të mbrojtur tregun e lirë dhe konsumatorin.