Miftaraj: Vendimi i Osmanit për mosdekretim të Isufajt i bazuar në ligj, KPK-ja të japë llogari

Drejtori i Insitutit të Kosovës për Drejtësi (IKD) Ehat Miftaraj, ka thënë se vendimi i presidentes Vjosa Osmani, për të mos e dekretuar Blerim Isufajn për Kryeprokuror të shtetit, është në linjë të njëjtë me qëndrimet e organizatave joqeveritare, reagimet e ambasadave, Zyrës së Bashkimit Evropian dhe Komisionit Evropian.

Në një reagim në Facebook Miftaraj ka thënë se Këshilli Prokurorial i Kosovës (KPK) ka dështuar të udhëheqë një proces të bazuar në meritokraci dhe me integritet.

“Nuk është hera e parë që Këshilli dështon në procese të tilla. Njëjtë kishte vepruar edhe me emërimin e Kryeprokurorit të PSRK dhe Prokurorisë Themelore në Prishtinë. Njëjtë kishin reaguar ambasadat e huaja, organizatat jo-qeveritare, Zyra e BE-së dhe Komisioni Evropian, duke i kontestuar këto procese dhe duke kritikuar Kosovën për gjendjen në sistemin prokurorial”, ka shkruar Miftaraj.

Ai ka përgëzuar Osmanin për siç ka thënë, lidership dhe vendimmarrje të bazuar në Kushtetutë, ligj dhe praktikën e ndërtuar nga Gjykata Kushtetuese.

“Sot duhet kërkuar llogari dhe përgjegjësi tek Këshilli Prokurorial pse po dështon vazhdimisht të sigurojë meritokraci dhe integritet në procese të rëndësishme të emërimeve të larta në sistemin prokurorial”, ka shkruar Miftaraj.

Edhe Arbëri 29 nën 2023 Presidenca për procesin e Kryeprokurorit: Presim nga KPK-ja t’i adresojë shkeljet procedurale

Sipas tij Këshilli Prokurorial duhet të zhvillojë një proces të ri “i cili proces duhet të fillojë përmes ndryshimit të Rregullores dhe dokumenteve përcjellëse dhe të sigurojë një proces të pavarur, të drejtë të bazuar në meritokraci dhe me integritet”.