Lista Serbe për betimin e deputetëve të rinj: Penguam planin e Kurtit për ndryshim të Kushtetutës

Lista Serbe ka folur për zëvendësimin e deputetëve në Kuvendin e Kosovës. Lista Serbe ka thënë se nëntë anëtarët e saj kanë verifikuar teknikisht mandatet e tyre, për t’i mbajtur të sigurta ato dhe janë larguar menjëherë nga Kuvendi.

Sipas Listës Serbe, ajo ishte “strategji për të penguar planin e Albin Kurtit dhe kolaboracionistëve të tij që ta ndryshojnë Kushtetutën”.

“Vendimi i sotëm strategjik pengoi drejtpërdrejt realizimin e planit të Albin Kurtit dhe kolaboracionistëve të tij që ta ndryshojnë Kushtetutën dhe ligjet me të cilat garantohen të drejtat e popullit serb në Kosovë e M. Synimi i Kurtit dhe Rada Trajkoviqit, e të tjerëve si ajo, është që të votonin ndryshimet Kushtetuese që do të çonin në shfuqizimin e komunave serbe, marrjen e pronave nga Kisha Ortodokse Serbe, heqjen e gjuhës serbe dhe të drejtat e përfaqësimit në institucione”, ka shkruar në reagim Lista Serbe.

Lista Serbe ka thënë se vendimi është strategjik dhe nuk do të ndalë procesin e largimit të serbëve të veriut nga institucionet e Kosovës.

“Në fund, duam të theksojmë, se qëllimi ynë është të mbrojmë popullin tonë, paqen dhe sigurinë, por edhe të mos lejojmë Kurtin e Rada Trajkoviqin, të vendosin për jetën tonë”, ka shkruar Lista Serbe.