Kusari-Lila thotë se VV-ja s'do të iniciojë procedurë për shkarkimin e Avokatit të Popullit

Ushtruesja e detyrës së shefes së Grupit Parlamentar të Lëvizjes Vetëvendosje, Mimoza Kusari-Lila, ka mohuar raportimet se Vetëvendosja do të iniciojë procedurë për shkarkimin e Avokatit të Popullit, Naim Qelaj.

Nëpër mediume ishte raportuar se Vetëvendosja po planifikon të shkarkojë Avokatin e Popullit, për t’ia pamundësuar atij që ta dërgojë në Kushtetuese rastin e shkarkimit të Valdete Dakës nga posti i kryesueses së KQZ-së.

Daka u shkarkua nga presidentja e Kosovës, Vjosa Osmani, ndërsa në vend të saj u emërua Kreshnik Radoniqi.

“Jo nuk është e vërtetë që do të iniciojmë procedurë për shkarkimin e Avokatit të Popullit”, ka thënë Kusari-Lila në një përgjigje për KOHËN.

Partia Demokratike e Kosovës është duke mbledhur nënshkrimet për ta dërguar në Kushtetutese vendimin për shkarkimin e Valdete Dakës.