Kryeministri në detyrë i Republikës së Kosovës, Albin Kurti, mori pjesë në pritjen e organizuar nga Presidenca e Kosovës me rastin e shënimit të 35-vjetorit të shpalljes së pavarësisë së Ukrainës.
Në fjalën e tij, Kurti tha se në vitin 1991, Parlamenti i Ukrainës votoi aktin përmes të cilit popullit ukrainas iu rikthye e drejta për të vendosur vetë për fatin e tij.
Ai theksoi se për më shumë se katër vjet, Ukraina është detyruar ta mbrojë këtë të drejtë me armë në dorë, pasi, sipas tij, Federata Ruse, e ndërtuar mbi logjikën e zgjerimit territorial, synoi ta zhbëjë me forcë pavarësinë dhe vullnetin e popullit ukrainas.
Kurti tha se qëndrimi i Republikës së Kosovës ndaj Ukrainës ka qenë i njëjtë që nga dita e parë, duke nënvizuar se solidariteti i Kosovës me Ukrainën nuk ka qenë kurrë transaksional.
“Ne jemi të vetëdijshëm se Kievi ende nuk e njeh pavarësinë e Republikës së Kosovës dhe ky qëndrim u përsërit para dy javësh. Ne besojmë se ai qëndrim nuk qëndron as para fakteve historike, as para të drejtës ndërkombëtare dhe do ta themi këtë sa herë të jetë nevoja”, deklaroi Kurti.
Ai shtoi se Kosova e mirëpret njohjen e pavarësisë së saj nga Ukraina, si dhe nga çdo shtet tjetër që ende nuk e ka njohur Republikën e Kosovës.
“Kosova dhe populli shqiptar qëndrojnë jo vetëm në vendin e tyre, por edhe në të drejtën e tyre historike”, përfundoi kryeministri në detyrë.
Edhe
Projekti i banimit social bën bashkë Pacollin e Lushtakun
Gjatë një vizite në fillim të gushtit të presidentit ukrainas, Volodymyr Zelensky në Serbi, ai ka thënë se qëndrimi i shtetit të tij për mosnjohjen e Kosovës si shtet të pavarur, nuk ka ndryshuar.
Nga Beogradi, në një konferencë për shtyp gjatë vizitës zyrtare, Zelensky është pyetur për çështjen e Kosovës. Ai ka thënë se e respekton integritetin territorial të Serbisë.
“Ne respektojmë integritetin territorial të partnerëve tanë. Ne e respektojmë të drejtën ndërkombëtare. Ky është qëndrimi ynë. Sa i përket asaj që thatë për shpalljen e njëanshme të pavarësisë së Kosovës, qëndrimi mbetet i pandryshuar. Gjithmonë e kemi theksuar këtë dhe se politika e Ukrainës nuk ka ndryshuar”, ka thënë ai, sipas mediave në Serbi.
