Kurti pret që Suedia t’i ndihmojë Kosovës ndaj agresionit serb

Kryeministri i Kosovës, Albin Kurti, ka uruar Suedinë për anëtarësimin në NATO, duke thënë se “një NATO e fortë nënkupton një Evropë më të sigurt”.

Ai ka shkruar në rrjetin social X se pret nga Suedia që ta ndihmojë Kosovën në ruajtjen e kufirit ndaj agresionit serb.

Anëtarësimin shtetit suedez në NATO, Kurti tha se e sheh si shans i madh për paqe pas agresionit rus në Ukrainë”.

“Një NATO më e fortë do të thotë një Evropë më e sigurt dhe një shans më i madh për paqe pas pushtimit brutal të Ukrainës nga Rusia. Shpresojmë që së shpejti t’i mirëpresim ushtarët e rinj suedezë të KFOR-it që Kosovën ta ndihmojnë në mbrojtjen e kufirit kundër agresionit të Serbisë”, ka shkruar Kurti.

Suedinë e ka uruar edhe presidentja e Kosovës, Vjosa Osmani dhe ministrja e Punëve të Jashtme dhe e Diasporës (MPJD), Donika Gërvalla.

Suedia u bë shteti i 32-të që iu bashkua zyrtarisht Aleancës së NATO-s.