Kryeministri Albin Kurti ka thënë se Kosova nuk i harron e as nuk i falë krimet e kryera, derisa ka shtuar se plagët e krimeve nuk vjetrohen.
Duke kujtuar masakrën e Serbisë në datat 27, 28 dhe 29 janar të 1999-s në Rogovë të Hasit, Goden e Bishtazhin të Gjakovës, Kurti ka thënë se të rënët janë momumentalizuar në historinë e Kosovës, derisa i ka kujtuar edhe 21 ushtarët e Ushtrisë Çlirimtare të Kosovës (UÇK).
“Përvjetorët na i përtërijnë plagët e luftës. Plagët e krimeve që nuk vjetrohen. Republika e Kosovës nuk i harron e as nuk i falë krimet e kryera nga Serbia. Më 27, 28 dhe 29 janar të vitit 1999, forcat e armatosura serbe i vranë 30 shqiptarë në Rogovë të Hasit, Goden e Bishtazhin të Gjakovës. Në këtë 25 vjetor i përkujtojmë luftëtarët dhe civilët e rënë për liri, që me sakrificën e tyre e shtruan rrugën deri te ҫlirimi i Kosovës nga Serbia okupatore”, ka shkruar Kurti në Facebook.
Kurti ka renditur emrat dhe mbiemrat e të rënëve nga masakra serbe.
“Të monumentalizuar në historinë e re të Kosovës, një çerek shekulli më pas i kujtojmë me emrat e tyre të rënët në ato ditë janari: Agim Zeneli, Agron Rama, Agush Gjocaj, Bahtjar Morina, Daut Kelmendi, Emrush Çetaj, Gëzim Ademaj, Gaspër Karaqi, Hamdi Berisha, Haxhi Kleçka, Ilir Merturi, Kasim Shala, Luan Smajli, Memë Lleshi, Naim Dreshaj, Naim Gashi, Prend Lleshi, Sahit Krasniqi, Sejdi Rama, Valon Gashi, Vesel Avdyli, Rrustem Morina, Selman Morina, Muhamet Morina, Nusret Morina, Xhevdet Berisha, Ibrahim Kryeziu, Adem Shala, Zyber Shala dhe Rifat Shala”, ka thënë ai.