Kurti: Kërkesa e Prokurorisë në Hagë injoron kontekstin e luftës në Kosovë

Kryeministri në detyrë Albin Kurti, ka reaguar pas kërkesës së Prokurorisë së Dhomave të Specalizuara në Hagë që t'i caktohet burgim prej 45 vjetësh secilit nga katër ish-krerëve të UÇK-së.

Kurti ka thënë se kjo kërkesë nuk mbështetet në ndonjë standard të pranuar ndërkombëtar të dënimit. Sipas Kurtit kjo injoron plotësisht edhe kontekstin e luftës në Kosovë.

"Ne nuk kemi pasur kurrë plan shfarosje të asnjë populli tjetër apo të civilëve. Kërkesa e sotme e Prokurorisë në Hagë për dënim prej 45 vitesh burgim për secilin nga drejtuesit e akuzuar të UÇK-së nuk mbështetet në ndonjë standard të pranuar ndërkombëtar të dënimit. Ajo injoron plotësisht kontekstin e luftës në Kosovë dhe përpiqet ta vendosë këtë çështje në një vakuum juridik, duke shkëputur veprimet nga realiteti i një lufte çlirimtare", ka shkruar Kurti në Facebook.

Tutje Kurti ka shkruar se "Institucionet e Kosovës do të vazhdojnë të mbrojnë të vërtetën faktike e historike, vlerën dhe dinjitetin e luftës për liri si dhe parimet themelore të drejtësisë, duke kundërshtuar çdo orvatje për shtrembërimin e tyre".