Kryeministri Albin Kurti ka qëndruar në Bashkësinë Islame të Kosovës (BIK) për nder të festës së Fitër Bajramit.
Ai aty është pritur nga myftiu i Kosovës Naim Tërnava.
Në një deklarim për media pas vizitës, Kurti ka thënë se Tërnava i ka njoftuar se sa shumë është rritur solidariteti në popullsi pikërisht gjatë muajit të Ramazanit.
“Ne urojmë që përkushtimi për anën shpirtërore të njeriut gjatë jetës dhe solidariteti shoqëror e farefisnor të mos jetë i kufizuar vetëm në këtë muaj por të jetë në secilin muaj gjatë gjithë vitit”, ka theksuar Kurti.
Ai në këtë vizitë ka kujtuar rolin, sipas tij të madh, historik e shoqëror të BIK-ut në historinë e re të Kosovës.
“Te medreseja janë organizuar shumë mbledhje e takime, të cilët edhe i kanë strehuar veprimtarët politikë por edhe kanë mundësuar tubime ku janë mbajtur diskutime e vendime të rëndësishme për zhvillimet politike të asaj kohe. E dimë që nga lufta e fundit 37 imamë i kemi dëshmorë të kombit sot”, është shprehur Kurti.
Abdixhiku uron Bajramin: Populli ynë ka nevojë për vlerat që përçon kjo festë
BIK-un e ka vizituar edhe kryetari i Lidhjes Demokratike të Kosovës (LDK), Lumir Abdixhiku.
Abdixhiku deklaroi se populli ynë ka nevojë për vlerat që përçon kjo festë, siç janë solidaritet e përkushtimi ndaj njëri-tjetrit.
“Sot myftiut Tërnava, bashkëpunëtorëve të tij, dhe nëpërmjet tyre të gjithë komunitetit mysliman në Kosovë, i uruam festën e Fitër Bajramit, një festë që vjen pas një muaji të shenjtë të agjërimit, sakrificës, dhe përkushtimit ndaj vetë Krijuesit, me shpresë që lutjet e tyre, agjërimi, dhe çdo përpjekje në rrugë të Zotit të jetë e pranuar nga vetë Zoti. Në këtë festë të rëndësishme dhe me traditë në vendin tonë, shpresojmë t'i rikujtojmë e t’i kultivojmë këto vlera njerëzore fillimisht, ndaj solidaritetit, përkushtimit dhe qëndrimit ndaj njëri-tjetrit. Vendi ynë ka nevojë për këto vlera”, ka theskuar Abdixhiku, raporton kp.
Në BIK për vizitë kanë qëndruar edhe zyrtarë të Aleancës për Ardhmërinë e Kosovës (AAK). Deputeti i AAK-së, Besnik Tahiri, ka thënë se për ta është me rëndësi është thuhet që këto festa i bashkojnë dhe i vendosin në momente reflektimi.