Kriteri i çmimit më të ulët për tenderë po konsiderohet shkelës i të drejtave të punëtorëve

Ligji i Prokurimit duhet të ndryshohet, ngase me të po shkelen të drejtat e punëtorëve.

Sipas këtij ligji, tenderi duhet t’i jepet operatorit ekonomik me çmimin me të ulët, dhe kjo sipas kryeinspektorit Bastri Ibrahimi, po ndikon që punëtorëve të sigurimit si dhe pastruesve të objekteve shtetërore t’u shkelen të drejtat, raporton KTV.

Sipas tij, kjo çështje duhet të rregullohet dhe të mos jetë ky kriter fare.

Edhe organizata Demokraci Plus ka bërë një hulumtim në lidhje me këtë çështje.

Agon Hysaj nga kjo organizatë ka thënë se kanë kuptuar se autoritetet kontraktuese nuk i parashikojnë siç duhet të drejtat e punëtorëve.

Disa punëtorë të cilët punojnë si sigurim, nuk kanë dashur të flasin para kamerës, por kanë pranuar se punojnë deri në 16 orë në ditë.

Demokracia Plus për këtë u rekomandon operatorëve ekonomikë dhe Organit Shqyrtues të Prokurimit që të marrin parasysh Ligjin e Punës.

Por, kryetari i OSHP-së, Blerim Dina, ka thënë se Ligji i Prokurimit është ndër më të mirët në Evropë, por varet se si e interpretojnë operatorët kontraktues.