Krasniqi i MI-së nuk respekton eprorin

Nexhat Krasniqi, edhe pse i shkarkuar, po del të jetë më i fortë sesa shefi i tij i ri, sekretari i Ministrisë së Infrastrukturës, Betim Reçica.

As Policia e Kosovës nuk ka mundur ta lirojë zyrën e Prokurimit në këtë ministri, që aktualisht është “uzurpuar” nga Krasniqi, i shkarkuar nga kjo pozitë me një vendim të Reçicës me 12 të këtij muaj.

Vetëgjyqësi dhe sfidim të shtetit e ka cilësuar sekretari faktin që Policia e Kosovës doli duarbosh nga zyra e Krasniqit, ani pse ishte thirrur nga Ministria për ta larguar atë, raporton KTV.

Vendimi thotë ta ketë marrë për shkak se të gjitha gjykatat në vend e kanë vërtetuar fajësinë e Krasniqit. Edhe Gjykata kushtetuese e vërtetoi këtë, në momentin kur në shkurt të 2018-s, vendosi ta deklarojë të papranueshme kërkesën e Krasniqit për një arbitraritet të gjyqësisë.

Por, ky shkarkim nuk kishte penguar Krasniqin që të hënën të nënshkruajë një mori dokumentesh si shef i prokurimit.

Por, vendimi i Reçicës u pezullua nga Këshilli i Pavarur Mbikëqyrës për Shërbimin Civil të Kosovës, ata kërkuan arsyet e shkarkimit.

Këshilli thotë se Sekretari i Përgjithshëm i MI-së “obligohet që të lejojë të ushtrojë detyrën e punës ankuesin sipas pikës 1 të këtij vendimi dhe të mos marrë asnjë veprim tjetër administrativ për procedurë deri në marrjen e vendimit përfundimtar nga ana e Këshillit të Pavarur Mbikëqyrës për Shërbimin Civil të Kosovës lidhur me ankesën e ankuesit”, gjegjësisht Nexhat Krasniqit.

“Kjo është hera dytë që ndaj Krasniqit ekziston një ndalës hyrje në Ministrinë e Infrastrukturës. Herën e parë ai u largua nga ministria me dhunë për shkak se ishte I dyshuar për rastin e MTPT-së për çka është shpallur I pafajshëm me vonë”, ka htënë Reçica.

Por, ende mbetet i paqartë kalimi i Krasniqit nga pozita e drejtorit të Departamentit Koordinues të Këshillit për Komunikacion Rrugor, ku ishte emëruar nga sekretari Nebih Shatri në tetorin e kaluar, në atë të shefit të prokurimit.

KTV-ja kishte raportuar për këtë çështje në marsin e këtij viti, por ish-sekretari i Ministrisë së Infrastrukturës Nehbi Shatri, nuk i ishte përgjigjur televizionit për këtë çështje.

Ministria nuk e sqaroi asnjëherë, përveç faktit se bazuar në proceset e tenderimit që ka hapur Ministria e Infrastrukturës që nga marsi i këtij viti, Krasniqi ka figuruar si shef i prokurimit të saj.

Madje, për këtë, i është nënshtruar testit të ricertifikimit për procese të prokurimit më 13 shkurt të këtij viti.