-
Nga:
Sanie Jusufi
- 24 tetor 2025 19:12
- Shpërndaje në:
Kryeministri në detyrë, Albin Kurti, ka promovuar të enjten rangimin e bërë nga një kompani private e që e ka prezantuar Kosovën në mesin e shteteve më të sigurta në botë për të investuar. Por, një ditë më vonë, emri i shtetit është larguar nga lista. Kompania që e ka bërë ranglistën nuk ka dhënë sqarime për këtë
Kryeministri në detyrë, Albin Kurti, është krenuar me indeksimin që kompania private “Henley & Partners”, ia ka bërë Kosovës, duke e prezantuar në mesin e shteteve më të sigurta në botë për të investuar.
Në Indeksin Global të Rrezikut dhe Qëndrueshmërisë së Investimeve, të publikuar të enjten, Kosova është ranguar në vendin e 26-të nga 225 shtete, duke i lënë pas Francën, Shtetet e Bashkuara të Amerikës (SHBA) dhe Japoninë. Por, të premten, emri i Kosovës nuk ka figuruar në listë. Ai është larguar bashkë me një numër shtetesh të vogla në territor.
Në kompaninë që e ka përpublikuar ranglistën nuk i janë përgjigjur pyetjeve të KOHËS lidhur me këtë, e as për metodologjinë dhe indikatorët që përdori për llogari të rangimit.
Me entuziazmin e kryeministrit nuk kanë folur për rangimin oponentët e tij politikë dhe as përfaqësues të bizneseve.
Lulzim Rafuna, kryetari i Odës Ekonomike (OEK), ka thënë se Kosova nuk qëndron mirë sa i përket tërheqjes së investimeve të huaja.
“Kosova është duke vuajtur për investime të huaja kualitative. Vetëm ato investime që rrisin prodhimin, nivelin e zhvillimit ekonomik dhe të mirëqenies së qytetarëve. Nëse i shohim të dhënat sot që janë publikuar nga ASK-ja e shohim që 12 e pak mbulohet bilanci tregtar mes importit dhe eksportit. Kjo është rezultati që më së miri tregon sa kemi investime dhe sa është e sigurt Kosova për të ardhur dhe investuar në vendin tonë”, ka theksuar ai.
E deputetja e Lidhjes Demokratike (LDK), Hykmete Bajrami, ka ironizuar me Kurtin.
“Në kohën në të cilën jetojmë edhe organizata të tilla mund të gjenden, por indeksimi nuk e ndryshon realitetin ekonomik”, ka shkruar ajo në Facebook.
Sipas të dhënave të Bankës Qendrore, nga janari e deri në qershor investimet e huaja direkte kanë qenë në vlerë 441.3 milionë euro, që shënon rritje prej 5.3 për qind krahasuar me periudhën e njëjtë të vitit 2024. Ato janë kryesisht investime në paluajtshmëri, të bëra nga diaspora.
Kryetar i Odës Ekonomike ka numëruar disa nga faktorët, për të cilët ka thënë se e bëjnë Kosovën vend të papërshtatshëm për investim.
“Sfida e parë është mungesa e fuqisë punëtore, e dyta është që as kjo fuqi që kemi nuk është e përgatitur me kërkesat e tregut, pse nuk është bërë nga ana e institucioneve reforma në sistemin e arsimit, shto këtu edhe pezullimin e dialogut strategjik me SHBA-të, me një fjalë imazhit që nuk e kemi të ndërtuar të mirë dhe të gjitha këto kanë qenë pengesë për mosardhjen e investimeve të huaja në Kosovë”, ka thënë Rafuna.
E kryeministri Kurti ka theksuar se, pavarësisht krizave globale dhe sfidave të shumta nga faktorë të jashtëm, Kosova vazhdon të forcohet, të ofrojë kushte më të mira për zhvillim socio-ekonomik dhe investime të sigurta.