Kosova dhe Madagaskari së shpejti do të vendosin marrëdhënie diplomatike

Republika e Kosovës dhe Republika e Madagaskarit shpejt do të vendosin marrëdhënie diplomatike, avancim ky më i lartë i përfaqësimit diplomatik në të dyja vendet respektive dhe do të organizojnë një Forum Ekonomik në mes dy vendeve.

Kështu thuhet në një komunikatë të MPJ-së pas takimit të ministrit të Punëve të Jashtme Behgjet Pacolli dhe ministrit të Jashtëm të Madagaskarit, Dovo Eloi Maxime, që u zhvillua në margjina të punimeve vjetore të Asamblesë së Përgjithshme të Kombeve të Bashkuara.

“U dakorduam për vendosjen e shpejtë të marrëdhënieve diplomatike që hapë rrugën e themelimit të Ambasadave, organizimin e një Forumi Ekonomik dhe bashkëpunim dy dhe shumë palësh. Do të jemi bashkë në Organizatën e Frankofonisë dhe Asamblenë e Përgjithshme të INTERPOL-it, në javët e ardhshme”, ka thënë Pacolli.

Pacolli, e ka falënderuar homologun e tij edhe për njohjen që kishte bërë shteti i Madagaskarit në një moment shumë të rëndësishëm.

“I thashë se njohja nga vendi juaj erdhi në një moment të rëndësishëm dhe ne ju falënderojmë”, ka thënë Pacolli.

Ministri i Jashtëm i Madagaskarit ka thënë se “me njohjen e Kosovës, ne thjeshtë kemi bërë atë që duhej, duke njohur luftën e saj për liri dhe pavarësi”.