Nën përcjelljen e ish-luftëtarëve të tij, komandanti i UÇK-së u paraqit për intervistim.
Ramiz Qeriqi, komandanti i Batalionit të dytë “Ramiz Salihu” ka dëshmuar të martën para Prokurorisë së Specializuar për Kosovën, në zyrën e tyre në Prishtinë, raporton KTV.
I njohur me nofkën “Luani”, ai është paraqitur para prokurorëve për të dhënë dëshminë e tij për kohën sa ishte pjesë e Ushtrisë Çlirimtare të Kosovës.
E ka thënë që ky është nder për të.
Qeriqi beson që është i ftuar në cilësinë e të dyshuarit, ani pse kjo nuk specifikohet në ftesën që ka marrë nga Dhomat e Specializuara.
Ai është marrë në pyetje për më shumë se 7 orë.
Qeriqi do të duhej të udhëtonte në Hagë për të dhënë dëshminë e tij, mirëpo për shkak të problemeve me pasaportë, këtë e ka bërë në Kosovë.
Ramiz Qeriqi ka dëshmuar edhe më parë në Hagë për luftën që është zhvilluar në Kosovë. Ai ka dëshmuar në rastin e Fatmir Limajt, Isak Musliut dhe Haradin Balës.
Po ashtu, më 2003 ai është intervistuar edhe si i dyshuar nga Tribunali i Hagës.
