Kearns: Mbështetja e Paunoviqit për spastrimin etnik është njollë mbi Qeverinë e Serbisë

Deputetja britanike Alicia Kearns ka reaguar ashpër ndaj deklaratave të ministres serbe Snezhana Paunoviq, për spastrim etnik në Kosovë.

Përmes një reagimi publik, Kearns tha se qëndrimi i Paunoviqit përbën “një njollë të rëndë mbi Qeverinë e Serbisë”. Ajo theksoi se brezi i njerëzve që sot janë në të tridhjetat i kujton ende mizoritë e kryera nga forcat e Sllobodan Millosheviqit ndaj popullsisë së Kosovës dhe familjeve të tyre.

Sipas deputetes britanike, çdo përpjekje për të justifikuar ose glorifikuar krimet e kryera gjatë luftës në Kosovë nuk mund ta bëjë botën të harrojë atë që ka ndodhur.

“Mos harroni kurrë”, përfundoi Kearns në mesazhin e saj.

Snezhana Paunoviq, ministre e Administratës Publike dhe Vetëqeverisjes Lokale në Qeverinë e Serbisë, ka deklaruar se po të kishte qenë në vendin e Sllobodan Millosheviqit në vitin 1998, do ta pastronte etnikisht Kosovën.

Këto deklarata ajo i ka bërë gjatë një interviste në televizionin serb “Kurir”.

Edhe Arbëri 16 kor 2026 Kosova padit Paunoviqin pas deklaratës për “spastrimin etnik”

“Po të kisha qenë në vendin e Millosheviqit në vitin 1998 do ta pastroja etnikisht Kosovën. Dhe ky është kualifikimi më i ashpër që e kam thënë ndonjëherë. Jo në mënyrën se si po duan ata të na likuidojnë neve, por në atë mënyrë që të mos ndihen pjesë e Serbisë dhe të shkojnë në shtetin e tyre amë”, ka thënë ajo.

Deklarata e Paunoviqit është dënuar në Prishtinë, në Bruksel e edhe në Serbi. Bashkimi Evropian ka bërë thirrje që politikanët në Serbi të përmbahen nga deklarata nxitëse e në kundërshtim me vlerat njerëzore. Deputeti shqiptar në Serbi, Shaip Kamberi ka premtuar inicim të shkarkimit të saj e disa parti opozitare në Beograd, kanë kërkuar dorëheqjen ose shkarkimin e Paunoviqit. Ndërkohë, zv.shefi i Qeverisë në këtë vend, Ivica Daçiq e ka mbrojtur atë.