KDI: Të papranueshme përplasjet politike të shndërruara në përplasje fizike

Instituti Demokratik i Kosovës i ka quajtur të papranueshme përplasjet në Kuvendin e Kosovës.

Përmes një komunikate për media, KDI-ja ka thënë se seanca e sotme e Kuvendit të Kosovës u shoqërua nga skena të papranueshme të dhunës.

“Një Kuvend, puna parlamentare e të cilit është mbushur me fyerje e ofendime, pa debate përmbajtjesore, kulmoi sot në skena të shëmtuara të konfrontimeve fizike. Imazhet sikurse këto janë rezultat i një klime joparlamentare, të cilës të gjithë aktorët politik parlamentar, pa dallim, duhet të mos i kontribuojnë. U bëjmë thirrje të gjithë partive politike dhe deputetëve të Kuvendit të Kosovës, të distancohen nga kjo klimë dhune që prodhoi skena të papranueshme brenda Kuvendit”, thuhet në reagimin e KDI-së.

KDI-ja ka thënë se dhuna, asnjëherë, përballë çfarëdo situate nuk mund të jetë mjet politik dhe në asnjë kontekst nuk mund të përligjet sikurse kjo e sotshmja.

“Po ashtu, kërkojmë nga organet e rendit që të ndërmarrin të gjitha masat e parapara me ligj ndaj akterve të përfshirë në dhunë”, thuhet në njoftim.