Lëvizja Vetëvendosje ka propozuar të mërkurën që në të njëjtën ditë me zgjedhjet lokale të mbahen edhe ato të parakohshmet. Propozimi u bë në takimin që presidentja Vjosa Osmani mbajti me përfaqësues të partive politike për caktimin e datës së zgjedhjeve lokale.
Por, një propozim të tillë e ka quajtur “ëndërr” Naim Jakaj nga Instituti i Kosovës për Drejtësi. Sipas tij, mbajtja e zgjedhjeve për një ditë nuk mund të bëhet.
“Për të shkuar në zgjedhje lokale dhe parlamentare në një ditë duhet të kemi Kuvend të konstituuar, aktualisht nuk e kemi. S’ka kuvend që shpërndahet dhe kjo do mbetej vetëm një ëndërr, është një ëndërr dita e zgjedhjeve në një ditë, sipas Kushtetutës”, ka thënë ai në “Interaktiv”.
Propozimi i LVV-së erdhi pasi, sipas deputetes Albulena Haxhiut, nuk po shihet zgjidhje për situatën aktuale në Kuvend. Kuvendi dështoi të konstituohet të mërkurën për të 26-tën herë me radhë.
Kuvendi do të mblidhet për seancën e radhës të enjten, një ditë pas seancës së fundit që u mbajt, ndryshe nga herat e kaluara kur caktohej pas 48 orësh.
E, Jakaj ka thënë se caktimi i seancës 24 orë pas, u bë në kundërshtim me procedurat e rregullta dhe rregulloren e Kuvendit.
“Nesër që mbahet seanca tjetër, po është shkelje procedurale sepse nuk pati një mocion që duhet të votohet nga Kuvendi me shmangie të rregullore, me 2/3 e deputetëve të pranishëm. Dehari nuk u kujdes sot që të japë një përpikëri të zbatimit të rregullores, nuk mundet me konsulta nga foltorja e tij të ndërmarrë iniciativa... Proceduralisht nuk është në rregull”, përfundoi ai.
