Naim Jakaj, autor i raportit të fundit të Institutit të Kosovës për Drejtësi, që e ka vlerësuar me notë të dobët punën e Kuvendit të Kosovës më 2022, ka thënë se ndër ndryshimet që duhet të bëhen janë që “kryeparlamentari të jetë më punëtor” e që “pushteti të mos i shfrytëzojë numrat si arrogancë”.
Në “Interaktiv” të KTV-së, të premten Jakaj ka thënë se Kuvendi i Kosovës nuk po tregohet efikas në punën e tij. Sipas Jakajt, janë mbi 20 gjetje pse puna e Kuvendit vitin e shkuar është vlerësuar e dobët. Ai ka thënë se Kuvendi punon pa miratuar planin e punës e me mungesë të deputetëve në votime dhe debate.
Sipas Jakajt, edhe pse pushteti ka shumicën e deputetëve në Kuvend dhe ka mundësi që asnjë ligj të mos e lë pa votuar “ka projektligje të rëndësishme, si ai për Kodin Civil, që kanë dështuar, pikërisht për shkak të deputetëve të grupit më të madh parlamentar”. Te ky projektligj ai është ankuar edhe për vonesën e kthimit të tij në seancë. Njëjtë ka thënë se ka zvarritje edhe për leximin e dytë të Ligjit për pagën minimale. Jakaj ka thënë se në raport me legjislaturat e kaluara, në mënyrë sasiore sesioni pranveror i vitit të kaluar ka kryer më shumë punë, por sipas tij “problemi është te përmbajtja”.
Jakaj ka thënë se komisionet parlamentare nuk kanë kryer punën e tyre siç duhet as në rastin e çështjes së Ligjit për mbikëqyrje elektronike për qytetarët të cilëve u kufizohet lëvizja me vendim gjykate, duke thënë se nuk kanë alarmuar që ky monitorim nuk ka qenë i zbatueshëm që prej vitit 2015. Sipas tij, alarmuese ka qenë edhe fakti që komisionet s’e kanë buxhetuar këtë çështje.
Sa i përket kryeparlamentarit Glauk Konjufca, që së fundmi është treguar më i rreptë me mospunën e deputetëve, Jakaj ka thënë se “nuk mjafton vetëm deklarimi”.
“Ai duhet të jetë më punëtor. Të thërrasë konsultime më shumë me grupe parlamentare. Ai po e bën këtë, por jo në mënyrën e duhur. Ai po i bën kritikat për ta mbuluar dështimin e Kuvendit në tërësi. Nëse kemi një Bord të Trustit pa anëtarë, BQK-në pa guvernator, kryetari duhet të alarmohet e të shohë ku është problemi dhe kryetari i komisionit do të duhej t’i jepte informacionet e duhura. S’duhet të jetë BQK-ja pa kryesues e të mos alarmohet kryetari, Kryesia e krejt Kuvendi”, ka thënë ai.
Jakaj ka pasur ankesa edhe për refuzimet e partive që të përkrahin iniciativat e njëra-tjetrës. Te “inatet politike” ai ka thënë se pushteti “s’duhet t’i përdorë numrat si mjet, apo arrogancë” për t’i çuar përpara vetëm iniciativat e veta.
Sipas tij, polarizimet politike vërehen edhe në rastin e Ligjit për Buxhetin, kur ministri nuk konsultohet me grupet parlamentare opozitare për ndonjë vërejtje, problem a diçka tjetër.
Ai ka thënë se ministrat kanë treguar papërgjegjshmëri në rastin e pyetjeve parlamentare, duke munguar në seancat e para kur shtrohen pyetjet.