Intervistimet e para për menaxhimin e krizës energjetike bëhen më 8 korrik

Komisioni Hetimor Parlamentar për menaxhimin e krizës energjetike nga Qeveria e Kosovws, do të fillojë me intervistimet e para, më 8 korrik.

Kryesuesi i këtij komisioni, Driton Selmanaj, ka thënë se Ministria e Ekonomisë, KOSTT-i dhe ZRRE-ja kanë dërguar dokumentacionet e nevojshme.

Fillimisht ai propozoi që më 4 korrik të jetë dita kur mund të ftohen të intervistuarit e parë.

Anëtari i komisionit nga radhët e PDK-së, Ferat Shala, ka thënë se është në rregull të fillohet me këtë datë por, duhet të ftohen anëtarët e bordit një nga një, si dhe paraprakisht të shqyrtohen CV-të e ekspertëve të ekonomisë dhe atyre ligjorë që do të bëhen pjesë e komisionit hetimor për energjinë.

Mbledhja e komisionit nga Qeveria e Kosovës është mbajtur pa praninë e anëtarëve të Lëvizjes Vetëvendosje. Kjo parti ka kërkuar që mbledhjet e komisionit të mbahen çdo të premte.

Selmanaj ka thënë se të premten, më 8 korrik do të zhvillohen intervistat dhe e para do të jetë me ministren e Ekonomisë, Artane Rizvanolli, ndërsa i dyti që do të ftohet për intervistim do të jetë ministri i Financave, Hekuran Murati. /ksp