Iniciativa për heqjen e homologimit, Kurti: Filloi fundi i zhvatjes

Fillim të fundit të zhvatjes e ka cilësuar kryeministri Albin Kurti, miratimin që sot kabineti qeveritar i bëri nismës legjislative për projektligjin për ndryshimin e Ligjit për Automjete, e që parasheh heqjen e homologimit.

Në mbledhjen e 14-të të Qeverisë, të mbajtur të premten, kjo ishte pika e parë që mori miratimin e kabinetit qeveritar. Nisma, sipas Qeverisë, parasheh ndryshimin e një neni për heqjen e detyrimit për homologim për mjetet rrugore të reja që kanë certifikatë të konformitetit.

“12 vjet radhazi kishim monopol në homologimin e automjeteve që pasuronte një oligark duke imponuar barrierë tregtare. Qytetarëve u duhen shërbime të mira e jo detyrime të padrejta. Tash është në duart e deputetëve të Kuvendit të Republikës që ta jetësojnë nismën ligjore për ndryshimin dhe plotësimin e Ligjit 05/L - 132 për Automjete”, ka thënë ai në një postim në Facebook të premten në mbrëmje.

KOHA ditë më parë raportoi se po që se hiqet homologimi, Kosova rrezikon një tjetër padi në Arbitrazh. Firma e vënë nga ish-ministri i Infrastrukturës, Pal Lekaj, dhe përfaqësuesi i kompanisë “EuroLAB”, në vitin 2018, ia mundësojnë kësaj të fundit të kërkojë drejtësi në Arbitrazh në rast se Qeveria Kurti e heq homologimin e veturave.