Inaugurohet Qendra BogdaniPolis në katedralen “Shën Nënë Tereza”

Kryeministri i Republikës së Kosovës, Ramush Haradinaj, mori pjesë sot në inaugurimin e Qendrës BogdaniPolis në Katedralen “Shën Nënë Tereza” në Prishtinë.

Siç njofton komunikata për media, Haradinaj me këtë rast tha se të gjithë qytetarët i janë gëzuar ndërtimit të Katedrales në Kosovë dhe e kanë përjetuar me gëzim qysh në fillim, duke thënë se është nder për të që në emër të Qeverisë të marrë pjesë në shtëpinë e popullit të Kosovës dhe të pritet nga Ipeshkivi i Kosovës, Imzot Dodë Gjergji.

Haradinaj, duke falënderuar përfaqësuesin e organizatës “Renovabis”, Burkhard Haneke, tha se Kosova dhe populli shqiptar kurrë nuk e harron nderin.

“Në emër të popullit të Kosovës falënderoj “Renovabis” për krejt kujdesin që ka bërë për këto 20 vjet për popullin e Kosovës”, tha Haradinaj, duke kërkuar që kjo ndihmë të vazhdojë edhe më tutje.

Po ashtu kryeministri tha se Qendra BogdaniPolis është një adresë e rëndësishme në vendin tonë, edhe shpirtërore, kulturore, por edhe e dijes.

Edhe Arbëri 29 maj 2019 Hapet Qendra për zhvillim të komunitetit malazez, Markoviq e Haradinaj thonë se është urë lidhëse mes dy vendeve

“Ne në Kosovë kemi disa të meta, bëjmë edhe gabime. Te besimtarët e krishterë rrëfimi është mundësi për ta rimarrë mundësinë për t’u kthyer në sukses, në punë, në të drejtën. Ne nuk duhet të zhgënjehemi nga gabimet tona, nga të metat, por duhet të shërbejnë për ne si mundësi e rinisjes”, tha ai, duke shtuar se është i vetëdijshëm se ka shumë detyra në vend për një jetë siç e bëjnë qytetarët në Gjermani, Austri dhe në vendet tjera, por tha se atë nuk mund të na bëjnë të tjerët, por duhet ta bëjmë vetë.

Haradinaj me këtë rast i ka dhuruar Imzot Dodë Gjergjit dhe Burkhard Haneke nga organizata “Renovabis” librin “Portrete të Skënderbeut gjatë shekujve” i botuar në kuadër të Vitit Mbarëkombëtarë të Skënderbeut.