Haradinajt s’i bëhet vonë, thotë se nesër do të flasë për dorëheqjet në veri

Kryeministri i Kosovës, Ramush Haradinaj, nuk e ka parë me urgjencë të deklarohet rreth dorëheqjeve të katër kryetarëve të komunave me shumicë serbe në veri.

I pyetur rreth kësaj çështjeje, ai nuk ka pranuar të flasë.

“Sot jam me tema tjera, nesër, nesër - nëse bën”, ka thënë ai pas përfundimi të Akademisë Përkujtimoret për Ilir Konushevcin dhe Hazir Malajn, raporton KTV.

Katër kryetarë të komunave në veri të vendit, ai i Mitrovicës Veriore, i Zveçanit, i Zubin Potokut dhe i Leposaviqit, kanë dhënë dorëheqje mëngjesin e sotëm, ndërsa kanë thënë se shkëpusin çdo kontakt me qeverinë e Kosovës, apo me “Prishtinën”, siç e kanë quajtur ata.

Ndërkaq, opozita në vend, gjendjen e krijuar pas dorëheqjeve e ka cilësuar si të jashtëzakonshme dhe ka kërkuar që Qeveria dhe Kuvendi të mblidhen për të shqyrtuar hapat e mëtejmë. /Meti Krasniqi