Haradinaj: Të gatshëm për qeveri të opozitës, por s’kemi kushte

Deputeti i Aleancës për Ardhmërinë e Kosovës, Daut Haradinaj, ka thënë se partia të cilës i takon nuk ka ndryshuar qëndrim, është e gatshme të votojë për tre emra për kryeparlamentar.

Haradinaj para fillimit të seancës së sotme për konstituimin e Kuvendit, ka thënë se po pret që partia që ka dalë e para në zgjedhjet parlamentare, të reflektojë.

Ai ka shtuar se AAK-ja është e gatshme për qeveri të opozitës, por pa ndonjë propozim konkret.  

“Po pres që do të reflektojnë. Kryeministri ka thënë se i kanë votat për Qeveri, jo për Kuvend, unë nuk e kuptoj se çfarë pozicioni po mban. Ne jemi të gatshëm ta japim votën për tre emra konkretë. Ne jemi të hapur për të bashkëpunuar, të bëjmë zgjidhje, kemi thënë që jemi të gatshëm për qeverinë e opozitës, nuk e kemi ndonjë emër apo preferencë, kemi thënë se nuk kemi kushte”, ka thënë ai.