Haradinaj s’i komenton akuzat e “Freedom House” për krim të organizuar

Ish-kryeministri i Kosovës, Ramush Haradinaj, në përgjigjen e tij për raportin amerikan të “Freedom House”, ku u lidh me krimin e organizuar, tha se gjithmonë “ka punuar dhe do të punojë për sundimin e ligjit dhe të demokracisë”.

Ai shkroi në Facebook të mërkurën, se do të jetë në krye të detyrës, që Qeverisë Kurti t’i bëjë opozitë “duke i treguar popullit për gabimet e saj në qeverisje”.

Në raportin e “Freedom House”, pos Haradinajt, u përmend edhe ish-presidenti Hashim Thaçi, që aktualisht ndodhet në Hagë duke u gjykuar.

“Korrupsioni e klientelizmi shpesh bëjnë presion për votë. Biznesmenët e pasur në Kosovë mund të kenë ndikim në zgjedhjet politike të punëtorëve të tyre. Serbia vazhdon të ushtrojë ndikim me platformën e Listës Serbe, si dhe të zgjedhjeve politike të serbëve etnikë në përgjithësi. Figura kryesore politike në Kosovë, përfshirë ish-presidentin Hashim Thaçi dhe ish-kryeministrin Ramush Haradinaj, kanë lidhje me krim të organizuar e korrupsion të nivelit të lartë, që kanë rol të madh në politikë dhe ndikojnë në vendosjen e liderëve kyçë”, thuhet në raport për çështjen se “a janë zgjedhjet politike të njerëzve të lira nga forcat dominuese?”. Kjo çështje është vlerësuar me dy nga katër pikët e mundshme. Raporti për këtë çështje është i njëjtë me atë të vitit të shkuar.