Haradinaj mburret me ‘progres’ në fuqizimin e sigurisë e forcimin e Prokurorive e Gjykatave, por TI-ja tha se Kosova është përkeqësuar

Kryeministri në detyrë, Ramush Haradinaj, është takuar me zëvendës ndihmës Sekretarin e Shtetit nga Byroja për Çështje Ndërkombëtare të Narkotikëve dhe Zbatimit të ligjit Jorgan K. Andrews.

Haradinaj tha se me të ka biseduar për partneritetin e Kosovës me SHBA-në, ‘në luftë kundër trafikimit të narkotikëve, krimit të organizuar dhe korrupsionit’.

Haradinaj thotë se "Kosova ka shënuar progres në fuqizimin e sigurisë", veçmas, thotë Haradinaj, "ka forcuar Policinë, Prokurorinë dhe Gjykatat". Por megjithatë, raporti i Organizatës ndërkombëtare Transparency International, e radhit Kosovën në vendin e 101.

Ky rezultat do të thotë që Kosova ka shënuar përkeqësim në luftën kundër korrupsionit në vitin paraprak, kur qe e 93-ta.

“Theksova se Kosova ka shënuar progres të rëndësishëm në fuqizimin e sektorit të sigurisë, veçmas duke forcuar Policinë, Prokurorinë dhe Gjykatat dhe është partner i denjë edhe për operimet globale në këtë fushë. E falënderova z. Andrews për ndihmën e pakursyer që ShBA-të kanë dhënë dhe po vazhdojnë të japin në forcimin e institucioneve të vendit dhe kërkova nga ai që ky partneritet të vazhdojë edhe në të ardhmen, duke shprehur gatishmërinë e institucioneve tona, karshi përgjegjësive të përbashkëta”, shkruan Haradinaj në facebook.

Ai gjithashtu ka shkruar se “Kosova ka arritur të ndërtojë institucione kredibile dhe të avancojë në profilizimin e tyre, falë edhe partneritetit me ShBA-të dhe sot jemi të gatshëm të qëndrojmë në krah me vendet aleate, në sigurimin e paqes dhe stabilitetit, jo vetëm për qytetarët tanë!”.