Haradinaj: Ka ardhur koha për ndëshkimin e Vetëvendosjes

Koalicioni mes AAK-së, Nismës, Intelektualëve, Konservatorëve e Ideal ka mbajtur në Deçan tubim me të rinjtë e kësaj komune. Nga komuna ku qeveris në nivel lokal AAK-ja, kandidati për deputet i këtij koalicioni, Daut Haradinaj, kritikoi Qeverinë Kurti për punën katërvjeçare

Për pjesëmarrjen në tubimin e koalicionit mes Aleancës për Ardhmërinë e Kosovës (AAK), Nismës Socialdemokrate, Intelektualëve, Konservatorëve e Idealit, të rinjtë e Deçanit u shpërblyen me një performancë nga artisti i njohur, me nofkën Majk.

Por para performancës, atyre iu drejtuan disa nga kandidatët për deputetë nga radhët e këtij koalicioni.

Në komunën bastion të AAK-së, kandidati Daut Haradinaj adresoi kritika për Qeverinë e kryeministrit Albin Kurti.

“Pikërisht kjo që i ofendoi veteranët e nënshkroi dhe ia fali Sava Janiqit tokën e pasurinë e Deçanit, prandaj, prej juve që jemi këtu prezentë po ju them, nëse ka banditë, kryebanditi është ajo”, ka thënë Haradinaj.

Ai ka theksuar se ka ardhur koha për ndëshkimin e qeverisjes katërvjeçare të Lëvizjes Vetëvendosje, pasi, siç ka thënë, ajo e neglizhoi rajonin e Dukagjinit.

Edhe Arbëri 2 shk 2025 Haradinaj: Deçanin do ta bëjmë adresë botërore të turizmit dimëror

“Kanë ofruar parajsën për Dukagjinin, por vendimi i parë që e ka marrë është heqja e taksës 100 për qind ndaj Serbisë, vendimin e dytë që e ka marrë kjo qeveri është ndalja e ndërtimit të autostradës së Dukagjinit, vendimin e tretë që e ka bërë kjo qeveri ka qenë anulimi i rrugës Deçan-Plavë”, ka theksuar ai.

Kandidati tjetër për deputet, Besnik Tahiri, e quajti koalicionin që i prin AAK-ja, si garanci për ndryshim të sigurt për mirëqenien e të rinjve.

“Prej një deri 110 janë gra e burra të dëshmuar në detyrën e vet, në punë e vet, por edhe në familjen e tyre. Secili i ri dhe secila e re, s’do të ndihet i diskriminuar në programin tonë sepse është i veçantë dhe konkret, që do të kthejë besimin në shtet”, ka thënë Tahiri.

E kryetari i Komunës së Deçanit, Bashkim Ramosaj, ka thënë se planprogrami qeverisës i koalicionit bazohet në zhvillim ekonomik.

“Të bashkohemi që policin ta kemi tamam polic, mësimdhënësin tamam mësimdhënës, e punëtorin shëndetësor po ashtu, doganierin, zjarrfikësin, ta kemi nëpunësin publik e privat ashtu siç duhet trajtuar dhe të kemi zhvillim ekonomik e të mos merremi me tema të kota”, ka thënë Ramosaj, i cili është edhe kandidat për deputet.

Edhe Arbëri 31 jan 2025 Haradinaj zotohet për uljen e papunësisë së grave

Ndërkaq, kandidati për kryeministër i koalicionit, Ramush Haradinaj, nuk qe prezent në këtë tubim. Ai ndodhet në SHBA për të marrë pjesë në inaugurimin e presidentit të ri amerikan, Donald Trump.

Programi qeverisës i koalicionit është i ndërtuar mbi katër shtylla: anëtarësimi direkt i Kosovës në NATO, zhvillimi ekonomik, përmbyllja e dialogut me Serbinë me njohje reciproke dhe integrim në BE, dhe ndaljen e braktisjes së Kosovës nga qytetarët.

Programi qeverisës i koalicionit përfshin edhe dyfishim të pagave në sektorin publik dhe rritje të pagës minimale mbi 500 euro. Po ashtu ky koalicion ka premtuar formimin e Ministrisë për Familje.

Në programin qeverisës të koalicionit përfshihet edhe mbështetja për gratë dhe shtesa për fëmijët e porsalindur. 1500 euro është shuma që ky koalicion është zotuar se do ta ndajë për familjet që presin fëmijën e parë, 2500 për të dytin dhe 3500 për të tretin.

Edhe Arbëri 17 jan 2025 Haradinaj kritikoi Kurtin për deklaratat ndaj biznesmenëve në Pejë

Në programin qeverisës koalicioni është zotuar edhe për ngritjen e cilësisë në arsim. Kjo përfshin, rritjen e buxhetit për arsim në 6 për qind të GDP-së, përmirësimin e infrastrukturës arsimore, rritjen e pagës për punëtorët e arsimit në të gjitha nivelet për 50 për qind. Po ashtu koalicioni ka premtuar reforma në organizimin e shkollave dhe arsimit të lartë, si rrjetëzimin e shkollave duke i bashkuar paralelet e ndara dhe shkollat fillore me më pak se 50 nxënës.

Një premtim tjetër i paraqitur në programin e koalicionit është ndryshimi në politikat makroekonomike dhe fiskale. Kjo përfshin përgjysmim të TVSH-së për të gjitha ushqimet më jetike të shportës bazë të konsumit, përjashtim apo ulje nga tatimi për barnat dhe shërbimet shëndetësore, ulje apo kompensim të TVSH-së për pjesën e domosdoshme të furnizimit me energji elektrike të konsumatorëve me asistencë, familjet e dëshmorëve, invalidëve dhe veteranëve të luftës së UÇK-së. Po ashtu, koalicioni është zotuar edhe për heqje ose zvogëlimi i akcizës dhe taksës së naftës për bujqësinë.