Haradinaj: BE-ja t’ia dorëzojë Bidenit portofolion për marrëveshje finale në dialog

Kryetari i Aleancës për Ardhmërinë e Kosovës (AAK), Ramush Haradinaj, ka thënë se është momenti i duhur që Bashkimit Evropian ta dorëzojë te presidenti, Joe Biden, portofolion për marrëveshjen finale për njohje reciproke Kosovë-Serbi.

Haradinaj në një postim në Facebook ka thënë se dialogu i deritanishëm nuk guxon të zbehet.

“Zbatimi i rendit dhe ligjit në tërë vendin, duhet të ndodh në përputhje me Kushtetutën dhe ligjet e Republikës së Kosovës. Dialogu i deritashëm nuk guxon të zbehet e të rikthehemi prapë të flasim për të njëjtat tema. Amerika kësaj here i dha shtytje procesit të udhëhequr nga BE dhe ndihmoi dhe e riktheu normalitetin në raportet Kosovë-Serbi. Duke i shprehur mirënjohje Bashkimit Evropian për lehtësimin e dialogut, është momenti i duhur që BE ta dorëzojë portfolion te presidenti Biden, për marrëveshjen finale për njohje reciproke Kosovë – Serbi”, ka shkruar Haradinaj.

Të enjten në Bruksel është mbajtur për orë të tëra takimi i nivelit të lartë në nivel të dialogut Kosovë-Serbi, ndërmjet kryeministrit të Kosovës, Albin Kurti dhe presidentit të Serbisë, Aleksandër Vuçiq me ndërmjetësimin e emisarit, Miroslav Lajçak.

Takimi ka përfunduar pa ndonjë marrëveshje, derisa përfaqësuesi i lartë i BE-së, Josep Borrell ka deklaruar se nuk do të dorëzohen.