Grevistët: Komuna synon ta falimentojë “Pastrimin”

Edhe të shtunën punëtorët e ndërmarrjes “Pastrimi” kanë vazhduar grevën para objektit të Komunës së Prishtinës. E ndonëse janë kontraktuar disa operatorë privatë, në një numër lagjesh mbeturinat nuk janë larguar

Jo pak metra larg objektit të vjetër të Komunës së Prishtinës, grumbuj mbeturinash nuk u larguan as në mesditën e së shtunës. Pas godinës, mbeturinat mbetën ndonëse një ditë më parë ky institucion njoftoi se mbledhja e tyre po realizohej pa ndalur nga operatorët e kontraktuar.

Mbeturinat nuk u mblodhën as në rrugën “27 nëntori” në Vranjevc, për çka u shpreh i mllefosur një banor i lagjes.

“Jo, asnjë hiç, as te shpija jem, asnjë rrugë nuk është pastruar, nuk janë ardhë, nuk vijnë”, tha Idriz Shabani, banor në rrugën “27 Nëntori”.

Ky banor u doli në mbrojtje punëtorëve të “Pastrimit” që prej tri ditësh janë në grevë.

“Duhet t’u plotësohen kërkesat këtyre punëtorëve nëse dëshirojnë që qytetarët e Prishtinës të jenë të shëndetshëm. Nëse jo, nëse kanë qejf me nejtë veç me privatnikë, le të rrinë, veç ta dinë se e kanë gabim, ta dinë se privatniku nuk është duke ua kryer punën këtyre sikur këta...”, ka thënë Shabani.

Nën tendën e vendosur në oborr të Komunës që u shërbeu edhe si strehë nga shiu, punëtorët e kompanisë rajonale të mbeturinave e vazhduan grevën.

“Ne vazhdojmë grevën hala edhe jemi ndërrimi i dytë, i pari sapo shkoi tash... Ne grevën nuk e ndalim deri në plotësimin e të gjitha kërkesave të cilat ua kemi shtruar sindikata jonë”, ka thënë Naser Hajdini, vozitës në Kompaninë “Pastrimi”, e i cili të shtunën ishte pjesë e grevës.

Ardian Krasniqi, kryetar i njërës prej dy sindikatave të punëtorëve të ndërmarrjes, listoi kërkesat, pa përmbushjen e të cilave tha se nuk do të hiqet dorë nga presioni sindikal.

“I duam paratë të cilat i kemi shërbyer nga janari dhe kontratë nga komuna, ashtu siç ka qenë gjithmonë. Statusi i KRM ‘Pastrimit’, çka do të ndodh me KRM ‘Pastrimi’?... Pagesa, kontrata, edhe ne dalim në punë, se kemi pare, kemi derivate dhe ne e vazhdojmë punën”, ka thënë Krasniqi.

Krasniqi tha se dialogu me zyrtarët e Komunës nuk mund të prodhojë zgjidhje të problemit, pa u plotësuar kushtet për punë.

“Ne nuk mund të operojmë në qoftë se nuk kemi të hyra. Të hyrat na i ka ndalë komuna... Për të operuar, neve na duhet nafta. Na duhet nafta, e këto gjana nuk janë se po ndodhin tash. Qe një vit e tepër janë duke u munduar të na falimentojnë. Në njëfarë mënyre, po donë me na falimentu, ana e komunës po duan”, ka thënë ai.

Një ditë më parë kompania “Pastrimi” ka nënshkruar kontratë prej 1.5 milionë eurosh me Komunën për mirëmbajtjen e hapësirave publike. Të shtunën në këtë kompani thanë se kontrata nuk i plotëson kërkesat dhe nuk sjell pagesa të menjëhershme.

E, në Komunë gjatë së shtunës nuk janë deklaruar për mbeturinat që nuk janë mbledhur në kryeqytet. E një ditë më parë theksuan se me nënshkrimin e kontratës është plotësuar një nga kërkesat kryesore të grevistëve dhe se është duke u shqyrtuar edhe kërkesa për zgjidhjen e statusit të ndërmarrjes.