Gërvalla udhëton në SHBA për Samitin e Amerikës

Ministrja e Jashtme e Kosovës, Donika Gërvalla, do të udhëtojë në SHBA për të marrë pjesë në Samitin e Amerikës.

Siç ka njoftuar MPJ e Kosovës, Gërvalla, do të jetë me ftesë të Sekretarit Amerikan të Shtetit, Antony Blinken.

Në ftesën e dërguar nga Blinken, thuhet se Gërvalla është e ftuar për të vëzhguar ngjarjet e Samitit të 9-të të Amerikës në Los Angeles që do të mbahet nga 8 qershori deri me 10 qershor.

“Me ftesë të Sekretarit të Shtetit Antony Blinken, kryediplomatja Gërvalla udhëton për në SHBA Zëvendëskryeministrja njëherësh ministrja e Punëve të Jashtme dhe Diasporës, Donika Gërvalla me ftesë të Sekretarit të Shtetit, Antony J. Blinken, do të marrë pjesë në “Summit of the Americas”, i cili do të mbahet në Los Angeles të ShBA-së. Kjo është hera e parë që Republika e Kosovës përfaqësohet në ketë Samit”, është thënë nga MPJ-ja e Kosovës.

Sipas MPJ-së së Kosovës, Gërvalla do të ketë në margjina të Samitit edhe takime bilaterale me zyrtarë të lartë të SHBA-së.

“Ministrja Gërvalla do të zhvillojë takime bilaterale me zyrtarë të lartë shtetërorë si dhe do të vazhdojë lobimin për ta forcuar subjektivitetin ndërkombëtar të Republikës së Kosovës”, thuhet në njoftimin e MPJ-së.