Ka kaluar edhe në lexim të dytë Rregullorja që do ta shtojë numrin e drejtorive në Komunën e Fushë-Kosovës.
Nga 11 drejtori sa i ka aktualisht kjo komunë, pas funksionalizimit të Rregullores për organizimin, kompetencat dhe përgjegjësitë e organeve të administratës komunale pritet të shtojë edhe 3 drejtori. Do të shtohen Drejtoria për Infrastrukturën Lokale, Drejtoria e Pronës dhe Drejtoria për Teknologji, Inovacion dhe Integrime Evropiane.
Por, zyrtarët e dy partive opozitare LVV e PDK nuk e kanë përkrahur iniciativën e ekzekutivit komunal. Këshilltari nga radhët e VV-së, Shpend Bardiqi, i ka thënë KOHËS se nuk kanë marrë fare pjesë në votimin e kësaj pike gjatë seancës që është mbajtur të martën, pasi nuk ishin marrë parasysh rekomandimit e Komitetit për Komunitete.
“Në mbledhjen e fundit të Komitetit për Komunitete rekomanduam që të kemi një drejtori të re dhe ajo të jetë Drejtoria për Komunitete, dhe propozuam që një nga tri drejtoritë e propozuara nga ekzekutivi ajo për Inovacion dhe Integrime Evropiane të bashkohet me Drejtorinë për Arsim kurse Drejtoria për Komunitete të jetë drejtori e veçantë. Mirëpo kjo u refuzua nga ekzekutivi dhe nuk u mor parasysh rekomandimi i Komitetit për komunitete”, ka thënë Shpend Bardiqi. “Për ne ka qenë më e udhës që të themelohet Drejtoria për Komunitete sesa ajo për Integrime të cilën e votoi pushteti. Problemet që kanë komunitetet në Komunën tonë janë elementare e me nevoja bazike të paplotësuara prej pushtetit. Prandaj një drejtori për komunitete do kishte pasur potencial për rregullimin e tyre, kurse për integrimet evropiane tashmë kemi zyrtar në Komunën tonë që merret me këtë çështje dhe besoj se ajo mjaftohet me kaq”.
Sipas këshilltarit të LVV-së kjo rregullore nuk ishte për zhvillim, por sipas tij, ishte për të përmbushur pazaret politike të pushtetit me subjektet në koalicion.
Edhe
Shtimin e drejtorive të reja në Fushë-Kosovë opozita e quan pazar politik
“Prandaj ne nuk morëm pjesë fare në votim sepse nuk u morën parasysh rekomandimet e Komitetit”, ka thënë ai.
Edhe shefi i Grupit të këshilltarëve të PDK-së, Mirsad Qyqalla, ka thënë se këto drejtori po themelohen vetëm për pazare politike.
“Me votat e pozitës sot kaloi në lexim të dytë Rregullorja për organizimin, kompetencat dhe përgjegjësitë e organeve të administratës komunale. Ne opozita ishim kundër. Qëndrimi jonë mbetet i njëjtë që këto drejtori po bëhen si rezultat i pazareve politike gjatë fushatës dhe mënyra qysh po bëhen veç me një vendim krijon një precedent që në të ardhmen të rritet numri i drejtorive sa herë që të kemi zgjedhje”, ka thënë këshilltari Qyqalla.
Por, u shprehën zyrtarët komunalë të Fushë-Kosovës.
Nënkryetari Fadil Krasniqi i ka thënë më herët KOHËS se themelimi i këtyre drejtorive do të duhej të themeloheshin edhe më herët.
Edhe
Fushë-Kosova synon t’i shtojë tri drejtori duke ndryshuar Rregulloren
“Fushë-Kosova nuk është më qyteti që ka qenë ose komuna që ka qenë më herët, për arsye se është një komunë duke u zhvillua në mënyrë shumë dinamike. Prandaj janë të domosdoshme që të themelohen edhe këto tri drejtori. Ju e dini që Fushë-Kosova është një qytet shumë dinamik, i cili ka rrugë të shumta, ka trotuare të shumta, ka edhe kanalizime e ujësjellës dhe që duhet faktikisht për çdo vjet të ndërtojmë objekte të reja dhe të bëhet dhe mirëmbahet një infrastrukturë si duhet”, ishte shprehur Fadil Krasniqi.
Megjithatë, këtë iniciativë, komuna e kishte nisur jashtëligjshëm, pasi kishte anashkaluar Statutin e Komunës dhe Rregulloren për organizimin, kompetencat dhe përgjegjësitë e organeve të administratës komunale, duke tentuar që shtimin e këtyre drejtorive ta bëjë vetëm me një vendim. Kjo ishte përpjekje ishte shpallë e jashtëligjshme nga Ministria e Administrimit të Pushtetit Lokal, duke e detyruar Komunën e që të bëjë plotësim-ndryshimin e Rregullore së lartcekur.
