Drejtoria e Inspeksionit, me vendim të Kuvendit Komunal të Mitrovicës, të premten ka filluar të rrënojë objektet të cilat janë të ndërtuara në afërsi të liqenit akumulues të lumit Ibër.
I pranishëm në këtë rast, ishte edhe drejtori i Inspeksionit të kësaj komune, Hysni Ahmeti, i cili tha se rrënimi i këtyre shtëpive po ndodh për të liruar pronën e Komunës, në mënyrë që të vazhdohet më tutje implementimi i projekti të liqenit akumulues.
Edhe kryetari i Komunës, Agim Bahtiri, tha se ky vendim është në përputhje me ligjin, pasi që ato shtëpi janë të ndërtuara në pronën komunale dhe tha se duhet të vazhdojë së implementuari projekti i liqenit akumulues.
“Projekti për rregullimin e liqenit në Suhadoll ka filluar në vitin 2014 dhe duhet të përfundojë plotësisht së realizuari në vitin 2020. Prandaj për t’u implementuar një projekt kaq madhor dhe milionësh në Komunën e Mitrovicës deri më tani janë rrënuar 14 shtëpi të cilat e kanë penguar realizimin e këtij projekti”, ka thënë ai, transmeton Koha.net.
Sipas Bahtirit, projekti i ndërtimit të liqenit në Suhadoll ka kushtuar 4.5 milionë euro, dhe me implementimin e tij do të shpenzohen edhe 4 milionë të tjera, ku qytetarët mitrovicas, por edhe ata të komunave të rajonit të Mitrovicës e të Kosovës, do të kenë kushte jashtëzakonisht të mira për të pushuar, për t’u freskuar gjatë ditëve të verës dhe për të bërë plazh.
Edhe
Do të vazhdojë rrënimi i objekteve pa leje afër liqenit akumulues në Suhadoll
Po ashtu Bahtiri theksoi se banorët kanë qenë të njoftuar paraprakisht që shtëpitë e tyre janë të ndërtuara në pronë komunale dhe se duhet liruar ato prona që sa më parë të implementohet ky projekt.
Ai ka kërkuar që të kenë mirëkuptim edhe banorët e atyre shtëpive, pasi që si organ ekzekutiv komunal e kanë për obligim të zbatojnë ligjin dhe të implementojnë projektet të cilat sipas tij janë në të mirë të të gjithë qytetarëve.
