Fëmijët e gruas që u rrah për vdekje nga bashkëshorti – të harruar nga shteti

Fëmijët e Hatije Dinës ndihen të lënë anash nga institucionet e vendit. Njëri nga djemtë e Dinës kërkon që institucionet të veprojnë më seriozisht karshi këtyre rasteve. Janë bërë më shumë se dy vjet pas vdekjes së Dinës, e cila u rrah deri në vdekje nga bashkëshorti.

Largimi nga Kosova është e vetmja rrugë që thotë se i ka mbetur njërit prej djemve të Hatije Dinës.

54-vjeçarja vdiq në qershor të 2019-s, pas plagëve të marra nga bashkëshorti i saj, Ilir Haxhiaj.

Njëri nga djemtë e viktimës është shprehur i zhgënjyer me qasjen e institucioneve të vendit. Thotë se institucionet nuk duhet vetëm të flasin, por edhe të veprojnë.

“Duhet këto raste të trajtohen më seriozisht, duhet të merret punë më e fortë jo vetëm më e lënë me një anë”, ka thënë ai.

Madje familjarë të Hatije Dinës kanë bërë kërkesë në Ministrinë e Drejtësisë për kompensim, ashtu edhe siç e parasheh Ligji për Kompensimin e Viktimave të Krimit.

“Prej që ka ndodhë rasti nuk kemi pasur mbështetje prej kurrkujt, as prej Komunës, as prej shtetit, as prej askujt. Nëse kisha pas mbështetje e përkrahje prej dikujt kish qenë më lehtë, e më kishte ndihmuar sadopak, nuk kisha mbet as anej as knej, e kisha pasur pak më të lehtë. Por me atë pagë që punoj nuk mundesh me ia dalë kurrgjë”, ka vazhduar ai.

Edhe Arbëri 1 nën 2021 Familja e Hatije Dinës e cilëson të padrejtë refuzimin e kërkesës për kompensim

Por kjo kërkesë është refuzuar nga shteti me arsyetimin se familjarët e viktimës është dashur që fillimisht të kërkonin dëmshpërblim nga dorasi, i cili është në vuajtje të dënimit me 15 vjet burgim, për veprën penale “Lëndim i rëndë trupor”.

Për dhunën e vazhdueshme që e ndjera kishte përjetuar ndër vite, në seancat e mbajtura muaj më parë kanë dëshmuar edhe djali i viktimës dhe vëllezërit e saj, të cilët kanë pohuar se viktima Hatije Dina ka përjetuar dhunë të vazhdueshme ndër vite nga bashkëshorti i saj.