Misioni i Bashkimit Evropian për Sundimin e Ligjit në Kosovë (EULEX), njoftoi të martën, se brenda një viti i ka kryer 21 operacione në terren, duke përfshirë nëntë zhvarrime, me ç’rast i ka identifikuar tre persona të zhdukur.
Në njoftimin për media, në Ditën Ndërkombëtare të Viktimave të Zhdukjeve me Dhunë, EULEX-i raportoi se që nga 2009-a, janë kryer 692 operacione, ku janë identifikuar 480 mbetje mortore, përfshirë 332 persona të zhdukur.
Sipas statistikave të EULEX-it, 89 trupa janë zhvarrosur në varrezat e myslimanëve në Mitrovicën Veriore, 81 në varrezat ortodokse në Arbëri, 77 në varrezat e Prizrenit, 59 në varrezat në Shirokë dhe 49 në varrezat e myslimanëve në Shirokë.
“Që nga fillimi i mandatit e deri më sot, EULEX-i ka punuar pareshtur për gjetjen dhe kthimin e mbetjeve mortore të personave të zhdukur tek familjet e tyre për një varrim të respektuar dhe dinjitoz”, thuhet në komunikatë, duke u bërë e ditur se ekspertët e EULEX-it po punojnë me autoritetet e Kosovës për rishikim të mbetjeve mortore njerëzore në morgun e Prishtinës.
Numri i trupave të zhvarrosur, sipas EULEX-it, në Brekoc është 121, në Çikatovë të Vjetër 230, Rakosh 97, Qirez 96, Studime e Epërme 93, Korishë 72, Suhodoll i Poshtëm 70, Makoc 63, Shudoll 61, Krushë e Madhe 58, Rudnicë 54, Suharekë 54 dhe Kizhevak 7.
“Për ta vështirësuar kërkimin e personave të zhdukur dhe për t’i fshehur provat, kryerësit e atyre krimeve i kanë fshehur trupat në varre të vogla klandestine apo edhe nëpër varreza”, thuhet në njofim.
-
Institucionet e Kosovës presin të rikthehen me gërmime për të zhdukurit në pesë lokacione në Serbi
-
BE: EULEX-i po asiston ekspertët e Kosovës, por nuk bën hetime të veta në Zubin-Potok
-
Për një vit u gjetën mbetje mortore të 16 personave që dyshohen se janë zhdukur gjatë luftës
-
Gjenden mbetjet mortore të tre personave të zhdukur gjatë luftës
-
EULEX-i dhe IML-ja forcojnë bashkëpunimin në punën për personat e zhdukur