Presidentja e Kosovës, Vjosa Osmani, në një intervistë për mediumin “Politico” nga Berlini, ka thënë se gjatë 5 vjetëve të fundit në Kosovë janë çmontuar mbi 900 banda kriminale, dhe është këputur zinxhiri që quhej “Mafia e Ballkanit”. Ajo ka thënë se më në Kosovë nuk ka banda kriminale.
Osmani ishte pyetur për vizitën që ministri i Jashtëm i Gjermanisë, Johann Wadephul, do t’ia bëjë Kosovës dhe vendeve të Ballkanit Perëndimor dhe se çfarë do të ishte një gjë që do t’i thoshte.
“Ai ishte zë i fuqishëm në Kosovë, duke na thënë luftoni krimin e organizuar dhe korrupsionin. E ka këtë partner. Në 5 vjet kemi çmontuar mbi 900 banda kriminale. Kemi këputur zinxhirin që quhej ‘mafia e Ballkanit’. Nuk ka banda kriminale në vendin tonë më”, tha Osmani.
Por, deklarata e Osmanit ka ngjallur reagime.
Deputeti i PDK-së, Artan Behrami. Ai e ka quajtur këtë deklaratë “doktorinë serbe të gënjeshtrave”.
“Kur ishin në opozitë, i përhapën stereotipet për Kosovën si me qenë favella e Ballkanit. Një shtet kriminal, me 900 banda, drogë, zhvatje, prostitucion… Tani që kanë ardhur në pushtet, po mundohen t’i zhdukin stereotipet që vetë i kanë përhapur. Edhe kësaj radhe me të njëjtën doktrinë. Me doktrinën serbe të gënjeshtrave”, ka shkruar Behrami.
Ish-deputeti nga radhët e PDK-së, Hisen Berisha, ka thënë se është një prej deklaratave më shqetësuese që mund të dalë nga goja e një presidenteje.
“Nëse, siç thotë presidentja, Kosova ka pasur 900 banda, dhe secila prej tyre ka vepruar qoftë edhe me numrin minimal prej vetëm 3 personash, atëherë kjo do të thotë se kemi pasur së paku 2,700 kriminelë aktivë. Pyetja më e thjeshtë që lind është: ku janë këta kriminelë?” – ka shkruar Berisha.
Gazetari shqiptar dhe kolumnisti Mero Baze ka thënë se Osmani duhet të ketë kujdes për imazhin e vendit.
“Presidentja e Kosovës duhet të bëjë kujdes për imazhin e vendit të saj. Kosova nuk ka pasur kurrë 900 banda. As 90. Madje as 9. E kuptoj nevojën për t'u lavdëruar si qeveri suksesi, por jo duke kriminalizuar Kosovën. Për 5 vjet as 900 aksidente me vetura nuk besoj se ka në Kosovë e jo më 900 banda. Një papërgjegjësi e tillë ekspozon Kosovën si vendin më kriminal në botë. Askush nga Serbia nuk e ka thënë këtë shifër edhe pse ata kanë vërtet bandat më të mëdha në Ballkan”, ka shkruar Baze në Facebook.
Të dielën mbrëma Presidenca e Kosovës ka dal me një sqarim. Në sqarim është thënë se Osmani u është referuar rasteve të trajtuara nga institucionet e rendit dhe jo numrit të bandave kriminale.
“Në fakt, është menduar për raste e jo për numër bandash. Siç e dini, disa banda serbe të veriut kanë qenë të involvuara në qindra raste të veprave penale”, thuhet në sqarim.
Tutje është thënë se Osmani nuk e ka paraqitur Kosovën si vend të krimit, por përkundrazi si shtet të sundimit të ligjit.
“Në asnjë moment Presidentja nuk e ka paraqitur Kosovën si vend të krimit, por si vend të rendit e ligjit dhe si vend ku respektohen në vazhdimësi vlerat evropiane të të drejtave të njeriut dhe sundimit të ligjit”, thuhet më tej.
Videoja e intervistës, të cilën presidentja e kishte postuar në Facebook, tash është zëvendësuar me një link i cili është postuar në faqen e YouTube të presidentes. Në videon e re është larguar pjesa e “çmontimit të 900 bandave kriminale”.