Bllokohet kanalizimi në një pjesë të Hajvalisë, Komuna premton rregullimin e tij brenda këtij viti

Me kundërmim të rëndë të fekaleve tash e gjashtë muaj po përballen banorët e rrugës “Shkëndija” në Hajvali të kryeqytetit. Bllokimi i rrjetit të kanalizimit në një puset, ku ujërat fekale rrjedhin përgjatë kësaj rruge, bëjnë që banorët të rrezikohen edhe nga ndonjë sëmundje.

Vështirë të përballueshëm kundërmimin e fekaleve e kanë familjet që jetojnë pranë pusetës, raporton KTV.

Banorët thonë se e kanë njoftuar Komunën e Prishtinës për këtë shqetësim, por kjo e fundit nuk ka intervenuar asnjëherë. Duke e cilësuar gjendjen të vështirë, banorët kërkojnë nga komuna të intervenojë dhe ta rregullojë infrastrukturën përgjatë kësaj rruge.

Por kjo, edhe për një kohë duket se do të jetë e pamundur, ngase Komuna vetëm në 2020 planifikon që ta rindërtojë këtë rrugë. Drejtori për Investime Kapitale në Komunën e Prishtinës, Gëzim Mehmeti, ka thënë se me rregullimin e rrugës do të evitohen edhe problemet me rrjetin e kanalizimit.

“Si komunë, kemi planifikuar që në vitin 2020 ta fusim në rindërtim gjithë rrugën “Shkëndija” të Hajvalisë të Prishtinës. Me rregullimin e kësaj rruge, do të zgjidhen edhe problemet me rrjetin e kanalizimit”, ka thënë Gëzim Mehmeti, drejtor i Investimeve Kapitale në Komunë të Prishtinës.

Por, banorët thonë se zyrtarët komunalë po e shtyjnë me qëllim zgjidhjen e këtij problemi, në mënyrë që ta rregullojnë në kohën kur të afrohen zgjedhjet.