-
Nga:
Valbona Bytyqi
- 24 janar 2024 12:54
- Shpërndaje në:
Zëvendëskryeministri i Kosovës, Besnik Bislimi, ka thënë se është shumë me rëndësi që të ndahet procesi i dialogut Kosovës – Serbi nga procesi i integrimit të Kosovës në BE.
Bislimi ka ripërsëritur qëndrimin që e dha kryeministri Albin Kurti në Shkup të hënën, që tha se duhet ndarë këto dy procese.
Bislimi në konferencën e përbashkët me ministrin për Çështje Evropiane të Republikës Çeke, Martin Dvorak, po ashtu ka thënë se është me rëndësi që BE-ja t’i heqë masat që ka vendosur ndaj Kosovës.
“Ne kemi ndarë shumë momente historike dhe suksese me qeverinë çeke. Më 15 dhjetor të vitit 2022, kryeministri Kurti në Pragë paraqiti aplikimin e Kosovës për anëtarësim në BE. Puna jonë me Republikën Çeke ka sjellë rezultate. Për shkak të këtij bashkëpunimi të shkëlqyeshëm ne kemi ngritur bashkëpunimin në nivelin e ambasadorëve me të drejta të plotë. Ne po ashtu kemi biseduar për masat aktuale kundër Kosovës. Pozita jonë është që masat duhet të hiqen, por më e rëndësishme është që procesi i dialogut të ndahet nga procesi i integrimit në BE”, ka thënë Bislimi.
E ministri Dvorak, tha se procesi i integrimit të Kosovës në BE është i lidhur ngushtë me dialogun Kosovë – Serbi.
Dvorak ka thënë se Kosova është nën presion për të treguar pozitivitet e konstruktivitet në dialog me Serbinë.
“Shprehja e miqësisë përfshin edhe të qenit i hapur e i sinqertë. Integrimet e mëtutjeshme të Kosovës në BE janë të lidhura ngushtë me dialogun me Beogradin”, ka thënë Dvorak.
Ai ka shtuar se Republika Çeke është e gatshme ta ndihmojë Kosovën në këtë rrugë e po ashtu në anëtarësimin në organizata tjera ndërkombëtare.
“Nuk më pëlqen ta them hapur, por duhet të them se Kosova është nën presion për të treguar pikëpamje pozitive e konstruktive në dialog me Serbinë”, tha Dvorak.
Sa i përket anëtarësimit të Kosovës në Këshillin e Evropës, Dvorak ka thënë se beson se është i mundur anëtarësimi.
