-
Nga:
Ardit Kika
- 9 dhjetor 2025 19:26
- Shpërndaje në:
Një vendim i pesë anëtarëve të Këshillit Prokurorial që e shkarkuan ushtruesin e detyrës së kryeprokurorit, ka marrë goditje nga Gjykata Supreme. Duke u thirrur në faktin se kishte ankesë në gjykatë, ata nuk e konfirmuan zgjedhjen e Elza Bajrami-Kastrati për anëtare të KPK-së. Por, Supremja ka konstatuar se zgjedhja e saj ka qenë sipas ligjit
Gjykata Supreme e ka rrëzuar ankesën e kandidates për anëtare të Këshillit Prokurorial (KPK), Merita Kurtishi Gaka, e cila është përdorur si pretekst nga 5 anëtarë të Këshillit për ta refuzuar zgjedhjen e Elza Bajrami-Kastratit si anëtare të këtij institucioni.
Pesë anëtarët e Këshillit që e shkarkuan ushtruesin e detyrës së kryeprokurorit, Besnim Kelmendi, nuk e miratuan as raportin e që konstatoi zgjedhjen e Kastratit, ndonëse ajo mori shumicën e votave nga prokurorët.
Vendimi i gjykatës nuk është ndikuar nga ai i 5-anëtarëve të këshillit.
“Ankesa e paraqitur nga Merita Kurtishi Gaka, Prokurore në Prokurorinë Themelore në Prishtinë, është e pa lejuar. Gjykata Supreme Kosovës, ka bërë vlerësimin e lejueshmërisë së ankesës në kuptim të dispozitës së nenit 8 të Ligjit Nr.08/L-249 Për Ndryshimin dhe Plotësimin e Ligjit Nr.06/L-056 Për Këshillin Prokurorial të Kosovës, me të cilën është përcaktuar se ‘Pas nenit 10 të ligjit bazik, shtohen nenet 10/A dhe 10/B me tekstin si në vijim’ të nenit 10/A dhe nenit 10/B, dhe sipas dispozitave përkatëse të nenit 10/A, (dhe) ka gjetur se ankesa është e palejuar, ndaj, ka vendosur që të njëjtën ta hedhë si të palejuar”, thuhet në aktgjykimin e Supremes.
Gjykata ka konstatuar se gjatë zgjedhjes së Elza Bajrami-Kastratit, janë respektuar të gjitha procedurat ligjore.
“‘Pas përfundimit të procesit zgjedhor, Komisioni Zgjedhor paraqet raport për Këshillin lidhur me kandidatët dhe numrin e votave për secilin kandidat dhe informon kandidatët për rezultatin e zgjedhjeve dhe të drejtën e ankesës për procesin. Kandidatët kanë të drejtë të paraqesin ankesë për shkeljet procedurale, në afatin prej 72 orëve pranë Këshillit, pas njoftimit me rezultatin...; Pas shqyrtimit të ankesave, Këshilli brenda 7 ditëve shpall dhe certifikon rezultatet përfundimtare të procesit zgjedhor..., etj.”, ndërsa, sikundër rrjedh nga shkresat e lëndës, kështu edhe ka ndodhur në rastin konkret”, thuhet në aktgjykim.
Supremja është duke e trajtuar edhe një ankesë që portali Paparaci e ka paraqitur kundër rregullores së zgjedhjeve të KPK-së. Për të, gjyqtarët do të mbajnë seancë vitin e ardhshëm.
“Padia e paraqitur nga Paparaci, ka për objekt shfuqizimin e pjesshëm të aktit nënligjor normativ - Rregullores Nr.05/2025 të datës 03.09.2025 për Zgjedhjen e Anëtarëve Prokurorë të Këshillit Prokurorial të Kosovës, konkretisht nenit 5 paragrafi 1 dhe 2, nenit 10 paragrafi 11 dhe 12. Paditësi, padisë i ka bashkangjitur edhe kërkesën për caktimin e masës së përkohshme të sigurimit. Gjykata Supreme, ka caktuar seancën e shqyrtimit gjyqësor për datë 03 shkurt 2026, ora 10:30”, ka bërë të ditur Supremja.
Ish ushtruesi i detyrës së kryeprokurorit, në prag të shkarkimit pati thënë se pronari i këtij portali ka tentuar ta shantazhojë dhe ia ka mbajtur anën prokurores Kurtishi-Gaka, por këto akuza i ka mohuar Vehbi Kajrazi.
Ndasitë në Këshill janë shpërfaqur publikisht muajin e shkuar.
Shkarkimi i ushtruesit të detyrës së kryeprokurorit e më pas vendimi për ta rrëzuar zgjedhjen e Kastratit si anëtare të KPK-së, ka marrë kritika nga përfaqësues ndërkombëtarë dhe ata të shoqërisë civile, të cilët kanë vlerësuar se me këto veprime synohet të pengohen reformat që hyjnë në fuqi nga janari.
Nga viti i ardhshëm, do të ulet numri i anëtarëve të KPK-së në 7.