“Beteja” brenda KPK-së vazhdon të hënën

Këshilli Prokurorial do ta mbajë të hënën mbledhjen e parë qëkur nxori vendimin për shkarkimin e Besim Kelmendit nga pozita e ushtruesit të detyrës së kryeprokurorit. Shkarkimi i tij është kontestuar gjerësisht e Kelmendi është ankuar për vendimin edhe në gjykatë. Anëtarët që u larguan nga mbledhja në prag të shkarkimit të tij me pesë nga 10 votat e Këshillit, kanë paralajmëruar se do të marrin pjesë

Anëtarët e Këshillit Prokurorial që u larguan nga mbledhja e 20 nëntorit duke mos marrë pjesë në votimin për shkarkimin e Besim Kelmendit nga pozita e ushtruësit të detyrës së kryeprokurorit dhe emërimin e Agron Qalajt në vend të tij, do të marrin pjesë në mbledhjen e KPK-së të hënën.

Mbledhja ku parashihen shtatë pika, ndër të cilat është edhe votimi për Raportin e Komisionit Zgjedhor për zgjedhjen e një anëtareje të re prokurore të KPK-së, është e para që nga vendimi për shkarkimin e Kelmendit me pesë nga 10 votat e anëtarëve.

Këshilli është i ndarë tashmë në dy taborë. 
Në mbledhjen e kaluar njëri tabor e kundërshtoi ashpër shkarkimin e Kelmendit dhe i fajësoi anëtarët e tjerë si dhe kryesuesin për shkatërrim të sistemit prokurorial.

Megjithatë, nga tabori që përkrahu Kelmendin pjesëmarrjen e kanë konfirmuar anëtari i shoqërisë civile Visar Krasniqi, si dhe anëtarët prokurorë Dardan Vuniqi dhe Veton Shabani.  
“Në mbledhje do të shkoj normalisht, mirëpo varet se si do të zhvillohet mbledhja. Nëse këta vazhdojnë prapë me vendime të kundërligjshme, nuk do të jem pjesë e veprimeve të këtilla. Krejt varet se a do të procedohet me rendin e ditës, siç është shpërndarë apo do të ketë ndryshime, nuk e di... Në momentin kur do të ketë veprime të cilat unë personalisht i konsideroj të kundërligjshme, normalisht që do të largohem, nuk bëhem pjesë e veprimeve të kundërligjshme”, ka thënë Krasniqi. 
Anëtari i KPK-së, Dardan Vuniqi, ka thënë se e sheh pjesëmarrjen e tij si pjesë të  obligimit dhe angazhimit për transparencë dhe funksionim normal të institucionit.

“Sa i përket vendimmarrjes, unë gjithmonë veproj në përputhje me ligjin dhe me rregulloret e Këshillit. Çdo vendim që merret duhet të jetë i pastër në aspektin juridik. Nëse eventualisht krijohen situata që cenojnë legjitimitetin procedural, unë do t’i vlerësoj brenda kornizës ligjore, ashtu siç e kam bërë gjithmonë. Qasja ime mbetet e njëjtë: respektim strikt i ligjit dhe i rolit tim”, është shprehur Vuniqi.

Pjesëmarrjen e ka konfirmuar edhe Arian Gashi, i cili ka thënë se në rast se paraqiten shkelje do t’i shfrytëzojë të drejtat e tij ligjore në interes të drejtësisë. 
“Unë nesër, si çdoherë tjetër, do të marr pjesë në takim për të cilin jam ftuar. Pa dashur të paragjykoj asnjë situatë, varësisht nga situata dhe nevoja që mund të paraqitet, do t’i ushtroj të drejtat dhe detyrat e mia ligjore dhe kushtetuese, gjithmonë në interes të drejtësisë, së cilës i jam betuar se do t’i shërbej si prokuror i Shtetit”, ka deklaruar Gashi.

Arsye të tjera ka dhënë Veton Shabani, i cili ka thënë se rastet disiplinore kanë afate ligjore që nuk presin. 
Ndërkohë ftesën e parë për të marrë pjesë në mbledhje të KPK-së e ka marrë Agron Qalaj, i cili me votat e pesë anëtarëve të këshillit u zgjodh ushtrues detyre i kryeprokurorit më 20 nëntor.

Qalaj, që mund ta ndryshojë balancën e votave në KPK, nuk ishte i qasshëm gjatë ditës së diel. 
Në një përgjigje për Kohën, KPK-ja ka shkruar se nuk ka asgjë të jashtëzakonshme përveç nevojës për vendosjen e disa pikave që janë brenda afateve për vendosje meritore.

E në pyetjen lidhur me padinë e Kelmendit dhe pse nuk e pritet vendimi i gjykatës mbi masën e përkohshme, në KPK kanë theksuar se nuk ka pengesa ligjore për mbajtjen e kësaj mbledhjeje.

“Deri tash për këtë çështje KPK nuk ka pranuar asnjë kërkesë nga ana e gjykatës kompetente për paraqitje të përgjigjes në padi. Sapo të marrim një kërkesë të tillë, KPK do të veprojë në përputhje me afatet dhe obligimet ligjore, duke paraqitur përgjigjen pa paragjykuar në asnjë mënyrë vendimin meritor të gjykatës. Andaj, mbajtja e takimit nuk bie në kundërshtim me asnjë dispozitë ligjore apo procedurale. KPK ka obligim të vazhdojë punën dhe të trajtojë çështjet që kërkojnë vendim brenda afateve të parapara”, thuhet në përgjigjen e KPK-së.

Në këtë mbledhje pritet të diskutohet për një nga pikat më të kontestuara mes anëtarëve – ajo e zgjedhjes së anëtares së re prokurore.

Rezultatet zgjedhore të 1 nëntorit e kanë nxjerrë fituese Elza Bajramin e Prokurorisë Themelore në Prishtinë, që fitoi ndaj kundërkandidates Merita Kurtishi-Gakës – së cilës i është rrëzuar ankesa për parregullsi në KPK, meqë pesë vota ishin për dhe pesë kundër.

Tabori që përkrahu Kelmendin e ka akuzuar kryesuesin Ardian Hajdaraj dhe anëtarët e tjerë se do që ta përmbysë rezultatin e votimit, por Hajdaraj i ka mohuar akuzat.