“Bashkëpunimi Kosovë – Kanada duhet thelluar”

Kryetari i Kuvendit të Kosovës, Kadri Veseli, ka takuar sot kryesuesin e Asociacionit Parlamentar të NATO-s në Kanada, Borys Wrzesnewskyj.

Sipas njoftimit nga Kuvendi, Veseli dhe deputeti federal biseduan për raportet mes dy shteteve.

Në njoftim thuhet se raportet janë shumë të mira dhe u vlerësua se kjo traditë e bashkëpunimit duhet vazhduar dhe thelluar më tej.

Veseli ka thënë se me shtete mike si Kanadaja, Kosova ndihet e sigurt në arritjen e aspiratave të saj për avancim të mëtejmë të demokracisë, zhvillim ekonomik dhe ecje më të shpejtë në rrugën e integrimit euro-atlantik. Veseli e njohu Wrzesnewskyjin edhe për vendimet e Kuvendit të Kosovës për krijimin e Ushtrisë dhe “potencoi përkushtimin e Kosovës për t’u bërë sa më shpejtë anëtare e NATO-s”.

Në anën tjetër, sipas njoftimit, zëvendëskryetari i Grupit Parlamentar të Miqësisë Kanada-Kosovë në parlamentin kanadez, ka garantuar mbështetjen e shtetit të tij për forcimin e subjektivitetit ndërkombëtar të Kosovës.