Arbëri

Bajrami: Buxheti 2025 anti-Kushtetues, s’lejohet të rriten koeficientët

Hykmete Bajrami

Foto: KP

Deputetja e Lidhjes Demokratike të Kosovës, Hykmete Bajrami, ka thënë se buxheti për vitin e ardhshëm është anti-Kushtetues, pasi me Ligjin e Pagave nuk lejohet të rritet sasia e koeficienteve.

Bajrami ka thënë se Qeveria e udhëhequr nga Albin Kurti po arrin në vitin e katërt dhe “asnjëherë nuk e ka realizuar atë qw e ka planifikuar”.

Është optimiste se qeverisja e ardhshme do të jetë e LDK-së, ndërsa theksoi nevojën për një rishikim të buxhetit nën udhëheqjen e partisë së saj.

“Buxheti ka një problem, është kundër kushtetues sepse flet për vlerën e koeficientin ndërkohë që me ligjin e pagave nuk lejohet të rritet sasia e koeficienteve me ligj të buxhetin por me ligj të pagave është e caktuar që të ndryshohet vlera monetare e koeficientit”, ka thënë Bajrami.

Kritika ka edhe për mospranim nga ana e mazhorancës të asnjë amendamenti të partive opozitare.

“Nuk ka ndodhur ndonjëherë në historinë e Kosovës që me një nen të ligjit të buxhetit të ndërrohen komplet shtojcat e një ligji tjetër. Ajo çfarë lejohet në nenin 33 të ligjit të pagave është që çdo vit me ligj të buxhetit të caktohet vlera e koeficientit. Është buxheti i pestë që e planifikohet dhe nuk pranohet asnjë amendament i opozitës”, u shpreh Bajrami, teksa shprehet se të vetmin që e kanë pranuar por që nuk është implementuar nga ana e ekzekutivit ka qenë amendamenti i LDK-së për të hyrat vetanake të komunave.

Ish-ministrja e Financave ka kritika edhe për mungesën e investimeve kapitale.

“Është planifikim nuk është realizim nëse shohim katër vitet e kaluara buxheti për investime kapitale nuk është realizuar, secilin vit prej vitit të parë kur e kemi pasur 800 milionë buxhetin e tash që e kemi rreth 930 milionë buxhetin për investime kapitale asnjëherë nuk është realizuar. Investimet kapitale është jashtëzakonisht i ulët kur vjen fjala tek niveli qendror sepse kemi pasur një realizim të mirë tek komunat. Buxheti për investime kapitale i shpenzuar në vitin 2023, është i barabartë me buxhetin e investimeve kapitale të viti 2018 veçse dallimi është se buxheti ka qenë 1.8 miliardë dhe në 2023 ka qenë 2.8 miliardë. Do të thotë kemi ngelur në nivelin e njëjtë të investimeve kapitale”, u shpreh Bajrami. /EO