Avokati Meshari Selimaj ka thënë se Aurona Pelaj e cila dyshohet për sulm fizik ndaj 70-vjeçares, Minire Nura në shtëpinë e të moshuarve në Pejë, mund të ketë ikur në Gjermani.
Në një intervistë për Euronews Albania të premten, Selimaj i cili është avokat i familjes së të moshuarës, theksoi se prokuroria ende nuk ka ngritur një aktakuzë ndaj saj.
“Me informacionet që kam Aurona Pelaj, mund të gjendet në Gjermani. Kështu po përflitet këto ditët e fundit. Prokuroria ende nuk i ka kryet hetimet. Prokuroria ende nuk e ka ngritur aktin-akuzues në gjykatë dhe gjykata ende nuk e ka mundësinë që ta ftojë Pelajn. Duhet të paraqitet me thirrjet, dhe nëse nuk paraqitet merren masat për lëshimin e urdhërarrestit”, ka thënë ai.
Ndërkaq në një deklaratë për KOHËN, avokati Selimaj ka thënë se ndaj Pelajt nuk ekziston ndonjë masë sigurie dhe se “me vendim të Gjykatës Supreme të Kosovës është liruar nga masa e paraburgimit dhe ka lirinë e plotë që të lëvizë kudo që ajo dëshiron”.
“Në momentin që kërkohet prezenca e saj si subjekt në procedurën penale ku unë përfaqësoj palën e dëmtuar, atëherë ekzistojnë mekanizmat sipas Kodit të Procedurës Penale të Kosovës që sigurojnë prezencën e saj në procedurë”, ka thënë Selimaj.
KOHA ka provuar të kontaktojë edhe me mbrojtjen e Pelajt, por një gjë e tillë ka qenë e pamundur deri pasditen e së premtes. Sapo të marrë përgjigje, artikulli do të përditësohet.
Gjykata Supreme e Kosovës ka vendosur t’ua ndërpresë paraburgimin tri infermiereve të arrestuara në lidhje me sulmin fizik ndaj të moshuares, në një shtëpi kujdesi në Pejë, në fillim të muajit nëntor të vitit të kaluar.
Në vendimin e Supremes të cilin e ka siguruar KOHA më 25 nëntor, thuhet se të pandehurave u ndërpritet paraburgimi dhe lirohen për t’u mbrojtur në liri.
