Avokati i Popullit, Naim Qelaj, ka kërkuar që të mos mbahet sekret vlera e koeficientit të pagave në sektorin publik.
Qelaj ka thënë të mërkurën në “60 Minuta” të KTV-së se secili i punësuar ka të drejtë të dijë nëse me Ligjin e Pagave do të ketë rritje apo ulje të pagës, apo nëse paga do t’i mbetet në nivelin e njëjtë.
“Është dashur të dilet me lartësinë e koeficientit sepse kështu të gjithë ata të punësuar në sektorin publik do ta dinin se si po i prek ky ligj, për të mirë apo të keq, po i rrit apo po i zvogëlon pagat, apo po i lë në nivel të njëjtë. Besoj që nuk ka më arsye edhe më tutje të mbahet sekret një diçka që duhet të jetë publike dhe u takon të gjithëve”, ka thënë Qelaj.
Ai ka shtuar se për Ligjin e Pagave është ankuar edhe sektori i drejtësisë, i cili siç ka thënë, ankohet se do t’u ulen pagat.
“Njëra prej ankesave vjen prej sektorit të drejtësisë – ankohen se me sistematizimin e ri me ligjin e pagave, ulen pagat, gjë që është në kundërshtim me Ligjin për Gjykatat dhe me parimet në të cilat funksionin sistemi i drejtësisë”, është shprehur Avokati i Popullit.
Qelaj ka folur edhe për ankesat lidhur me Ligjin për Zyrtarët Publikë, duke thënë se janë kryesisht pretendime që kanë të bëjnë me mandatet e stafit të mesëm dhe të lartë drejtues.
Qelaj ka thënë se me këtë rrezikon të ndodhë instrumentalizimi politik i administratës civile.
“Pretendimet kanë të bëjnë me mandatet e stafit të mesëm dhe të lartë drejtues sepse ekziston rreziku i instrumentalizimit politik të administratës civile gjë që e dëmton demokracinë e një vendi e dëmton edhe sundimin e ligjit dhe qeverisjen e mirë”, është shprehur Qelaj.
Ligji i ri i Pagave i cili është miratuar në dhjetor pritet të hyjë në fuqi brenda tri javëve mirëpo vlera e koeficientit nuk është bërë publike ende.