Ashton: Lajçaku e do suksesin e Kosovës

Ish-ndërmjetësuesja në dialogun mes Kosovës dhe Serbisë, Catherine Ashton, ka thënë se shpreson që në muajt dhe vitet e ardhshme do ta shohin që procesi i dialogut do të ecë përpara. Por sipas saj kjo nuk do të jetë e lehtë.

Derisa ka folur në konferencën në Prishtinë me titull “Dialogu me Serbinë: Mësime nga e kaluara për të ardhmen e procesit”, që është organizuar nga Grupi për Ballkan, ajo ka folur edhe për të dërguarin e posaçëm të Bashkimit Evropian për dialogun mes Kosovës dhe Serbisë, Miroslav Lajçak.

“Lajçaku ka punuar për mua dhe me mua për shumë vjet dhe është person që e do suksesin e Kosovës”, ka theksuar Ashton.

Një ditë më parë kryeministri Albin Kurti ka thënë se Lajçaku dhe shefi i Bashkimit Evropian për Politikë të Jashtme dhe të Sigurisë, Joseph Borrell kanë rënë në kushtëzimet e presidentit të Serbisë Aleksandar Vuçiq. Sipas tij kushtëzimi i Serbisë me Asociacionin e komunave me shumicë serbe tashmë është shndërruar në qëndrime të emisarëve Borrell dhe Lajçak.

Ashton ndërkohë ka thënë se mbetet e përkushtuar për dialogun. “Nëse ndonjëherë ka diçka që mund të bëjë në përkrahje të dialogut dhe të përafrimit të Kosovës me Serbinë unë do ta bëjë”, është shprehur Ashton.

Reeker: 10 vjet pas në dialog flitet për tabelat e veturave

Në këtë tryezë konferencë ka marr pjesë edhe ish-ambasadori amerikan në Maqedoni të Veriut, Philip Reeker.

Ai ka thënë se është e rëndësishme të kujtojmë se çfarë ka prodhuar dialogu.

“Nga perspektiva personale... 10 vite pas ata janë ende duke diskutuar për tabelat e veturave”, ka theksuar Reeker.

Sipas tij BE-ja dhe SHBA-ja janë të përkushtuar t’i ndihmojnë Kosovën dhe Serbinë.

“Ju dëgjoni njerëzit duke folur për parimet. Por është gjithashtu siç balanconi parimet dhe vlerat me sigurinë. Një dekadë më vonë BE-ja dhe SHBA-ja janë të përkushtuara të ndihmojnë njerëzit e këtij rajoni, Kosovën dhe Serbisë. Mendoj se duhet të kthehemi mbrapa dhe të shohim se çfarë është arritur dhe jo te ngelim në krizat e krijuara, të panevojshme”, ka theksuar Reeker.

“Mos u fokusoni në atë se çfarë ka ndodhur më parë, çfarë ata kanë bërë, fokusohuni në atë që ju do të bëni”, ka shtuar ai.